Nærast midt i Ålesund sentrum med daglege anløp av cruiseskip og fraktefarty går føre seg Borgundfjordfisket. Torsken kjem inn i Borgundfjorden for å gyte og ut over våren ligg båtane tett i tett for å fiske. Kysttorsken som kjem inn fjorden er freda, så det er berre fritidsfiskerane som får delta.
– Vi som har halde på i mange år, er like entusiastiske kvar gong. Det er berre heilt fantastisk å ligge ut på fjorden, seier Stein Magne Hoff.
LES OGSÅ:
Inviterer bedriftskundar på fiske
Han prøvde fiskelukka i dag, men var litt for sein. Fisken bit best morgon og kveld. Dei andre han prata med fekk fin torsk på mellom 15 og 20 kg.
Kvart einaste år tar Hoff med seg grupper ut på fjorden. Ofte er det lokale bedrifter som inviterer med kundane ut på dette heilt spesielle fisket. Også danskar og svenskar står på kundelista til Hoff.
Snorre nemnde fisket
Borgundfjordfisket har gått føre seg heilt sidan til mellomalderen, og er nemnt i Snorres kongesagaer.
I 1756 skal nesten 500 båtar ha delteke i fisket. Mytane seier at det var så mange båtar som låg på fjorden at det var mogleg å gå tørrskodd frå Borgundgavlen og over til Slinningen.
– Det hender seg ofte at vi får så mykje fisk at eg må flytte båten. Det tar heilt av og vi vil jo ikkje ha alt for mykje fisk, ler Hoff.