Vart vekt av hunden då huset brann

Det var i 03-tida i natt at sambuarparet som bur i eit trehus like utanfor Ørsta sentrum vakna av hunden. Då dei stod opp merka dei røyk i gangen og deretter gjekk brannalarmen. Dei fekk med seg hunden ut og varsla brannvesenet.

– At dei kom ut frå huset uskadd, trur eg er takka vere hunden. Det meinar dei sjølve også, seier operasjonsleiar ved Sunnmøre politidistrikt, Borge Amdam. Begge vart køyrt til legevakt for sjekk.

Brannvesenet kom raskt til staden og fekk sløkt brannen. Huset ligg for seg sjølv, og det var aldri fare for at den skulle spreie seg.

– Huset framstår som totalskadd. Seinare i dag vil politiet søke etter brannårsaka, seier Amdam.