På Årset på Vartdal i Ørsta renn vatnet alle andre plassar enn i anleggsrøyra som er lagde ned i området. Små og store røyr stikk rett ut i lufta, medan naturen har laga sine eigne elver rundt.
– Ingeniørar, entreprenørar og Ørsta kommune har jobba med å legge ned anleggsrøyr heilt sidan det store jordraset som tok eit hus i området her for to år sidan, men no er vi like langt, seier Håvard Eikebø. Han ristar på hovudet over den jobben som er gjort her.
Vatnet renn utanfor dreneringsrøyra i Årsetdalen.
Foto: Jannicke Farstad / NRKFamiliar vart huslause
Det var i november 2013 at eit jordskred gjekk i Årsetdalen. Skredet førte til at to familiar vart huslause og 40 personar vart evakuerte. Eikebø er ikkje imponert over arbeidet som har blitt gjort i ettertid.
– Det er heilt sjukt. Det er gjort for dårleg arbeid. Vi som bur her og ser korleis vassføringa i elva er, ser at røya er for små, seier han.
Han er mest fortvilt på vegne av naboar, som han fryktar ikkje får den hjelpa dei treng i situasjonen dei står i.
LES OGSÅ:
Diskuterer situasjonen
Fredag gjekk det eit lite jordras i området på grunn av enorm nedbør. I dag sit dei som vart mest råka av dei store vassmassene i eit møte for å diskutere kva dei skal gjere.
– Situasjonen er fortvilt, seier Helge Årset. Han vil ikkje uttale seg meir i saka fordi han meiner det ikkje hjelp uansett kor mykje dei har prøvd å sette fokus på problema. For to år sidan vart garden hans øydelagt av raset.
Fryktar nye ras
Håvard Eikebø føler seg ikkje trygg i området.
– Trygge er vi vel ikkje. Det ville vere å overdrive, seier Håvard Eikebø. Han fryktar at heile fjellsida er rasfarleg.
Han står og kikar på dei nye øydeleggingane saman med Ernst Larsen, som også bur i dette området. Dei meiner begge to at bygda må få hjelp til å lage eit nytt løp for vatnet, som vil fortsette å renne ned frå fjellet.
– Det må gravast eit heilt anna løp, slik at vassmassene blir ført rett ned til storelva, Uansett kva slags røyr som blir lagt ned her, vil dei bli fylt med stein, seier Ernst Larsen.
Ordførar i Ørsta, Stein Aam, kallar inn til nytt møte måndag for å vurdere situasjonen.
Foto: Marta Lystad JohansenMøte i kommunen
Ordførar i Ørsta, Stein Aam (Sp) seier at kommunen hadde krisemøte fredag og at han sjølv var på synfaring i Årsetdalen, der han såg dei enorme mengdene med vatn. Han forstår at dei som bur der er bekymra og kallar inn til nytt møte måndag.
– Vi skal sjå på forholda og finne ut om tryggleiken er bra nok. Det må fagfolk vurdere, seier Aam.
Slik såg det ut i Årsetdalen etter raset i 2013.
