Det er varsla storm og store nedbørsmengder over heile Vestlandet dei neste dagane. Allereie fredag skapte vinden problem for fotgjengarar i Ålesund, og regnvêret gjorde mange søkkblaute for første gong denne hausten.
Men mange tok uveret fredag med stor ro, enkelte til og med med glede. Etter ein uvanleg varm og langvarig sommar er mange kjempefornøgde med at årstida no skiftar.
Barbro Godø Thomassen nyt uveret i Ålesund fredag.
Foto: Synnøve Hole
– Det er heilt fantastisk, endeleg litt ver! Eg måtte gå ein ekstra runde her i byen berre for å nyte det no før jobb. Vi har hatt fint ver så lenge, no var det på tide med litt regn og vind og skikkeleg ver, jublar Barbro Godø Thomassen.
På Skansekaia tok ho oppstilling i regnklede, rett mot vinden, for å kjenne vêret maksimalt.
Båtar i havsnaud
Førebels er det meldt om få skadar og problem som følgje av uveret. Politiet På Nordmøre og i Romsdal melder at redningsskøyta hjelper ein fiskebåt, etter å ha drive på land i Frænafjorden. I Fannefjorden skal ein fritidsbåt ha slite seg.
Sunnmørspolitiet melder om at eit tre har velta over fylkesvegen mellom Brattvåg og Vatne i Haram, og eit stillas skal ha blåse over ende på Valderøy i Giske kommune.
Vrengt paraply
Paraplyen til sveitsiske Janine Herren hadde ingen sjanse mot vinden i Ålesund sentrum fredag. Han vrengde seg tallause gongar, men Herren klagar ikkje.
– Det er ei oppleving å gå til kontoret no, smiler ho.
– Eg er ikkje vand med så mykje vind og regn, så eg syns det er interessant, seier ho før ho hastar vidare til jobb med våte bukser.
– Det er berre fint med ein storm, det har vore alt for mykje fint ver, supplerer Roy Knutsen.
Fleire båtar har gått til kai i Ålesund fredag.
Foto: Synnøve Hole
Full storm langs kysten
Meteorologisk institutt sende fredag ut OBS-varsel for kysten. Det er meldt liten storm og lokalt mykje nedbør i Nordland, og vest til sørvest full storm på kysten av Møre og Romsdal og Trøndelag, med sterke vindkast innover land. Også i Hordaland og Rogaland er det venta store nedbørsmengder laurdag.
Vaktmeister Tom Barstad på rådhuset i Ålesund har mykje ekstraarbeid med å reinske tette slukar fredag.
Foto: Synnøve Hole
Men ikkje alle er like glade for veromslaget. Vaktmeister Tom Barstad seier det blir mykje ekstraarbeid når det regnar så mykje som det gjorde fredag morgon.
– Det er eit heilt forferdeleg ver i dag. Det blir så mange tette slukar og mykje lauv, seier han. Men legg til at det ikkje er lov å klage.
– Ein gang må jo hausten kome. Vi må vel berre vere fornøgde med den sommaren vi har hatt, det har jo vore heilt fantastisk, så dette må vi berre tole, seier han.
Vil nyte dagen innandørs
Trine Klemetsen seier det er fantastisk med ruskevêr til helga.
Foto: Synnøve Hole
Også bypatriot Trine Klemetsen var ute i ålesundsgatene fredag, og priste vêret.
– Det er heilt fantastisk, endeleg litt ruskevêr! No kan vi kose oss litt inne også, det er jo så travelt å vere med på ting heile tida når det er fint ver. Det er jo ikkje lov å vere inne i Ålesund når det er finever, ler Klemetsen.
– Kor rask var du frå bilen og inn i dag?
– Rimeleg rask, men det var fordi eg hadde medvind, ler ho.
