Avgjerda om éin eller to AMK-sentralar i fylket kjem etter at det er bestemt å bruke 40 millionar kroner på nye AMK-lokaler i Ålesund for å få på plass det nye naudnettet.
Tilsett-representant Knut Ivar Egset meiner dette er kritikkverdig.
– Eg reagerer på at Helse Midt-Noreg ikkje vel om ein skal ha éin eller to AMK-sentralar før ein set i gang med å bygge i Ålesund.
– Saka er avgjort før den vert vurdert
Direktør Trond Michael Andersen i Helse Midt-Noreg har varsla ein ny gjennomgang av AMK-sentralane i Møre og Romsdal i november. Det kan bety kroken på døra for AMK-sentralen i Molde, som i dag fungerer for Nordmøre og Romsdal.
Her er det noko som skurrar, meiner Egset, for blir konklusjonen at det berre skal vere éin AMK-sentral er det allereie avgjort kvar den sentralen skal ligge.
– Dersom det no vert éin AMK-sentral, så vil den ligge på Sunnmøre. Då er den saka avgjort før den eigentleg vert vurdert, seier ein opprørt Egset.
– Dette er klart i strid med både arbeidsmiljølova, hovudavtalen, og ikkje minst helseføretakslova.
– Feil å bygge ut utan diskusjon
Egset fortel at dei tilsette i Helse Møre og Romsdal reagerer på måten dette vert handtert på frå Helse Midt-Noreg si side.
– Det er klart det er veldig fortvilande at Helse Midt-Noreg køyrer slike prosessar. Vi veit at dei har visst om denne saka i fem år og dei vel heilt bevisst å ikkje ha gode prosessar.
Styreleiaren i Helse Møre og Romsdal, John Harry Kvalshaug, seier det er uaktuelt å utsette innføringa av naudnett i Ålesund, men han har forståing for kritikken mot det som har skjedd.
– Eg føler det er feil at ein skal bygge ut AMK-sentralen i Ålesund utan at strukturen på AMK-sentralane i fylket har vore diskutert.
Frustrert
Ein av dei som deler frustrasjonen over AMK-handteringa, er Atle Tangen, som er leiar for Landsforeningen for hjerte- og lungesyke i Møre og Romsdal. Mange av medlemmane har, bokstaveleg talt, kor viktig AMK-sentralane er.
– Eg blir frustrert, og det ikkje så reint lite heller.
Tangen understrekar at AMK-sentralen i Ålesund sikkert treng 40 millionar kroner til nye lokale, men han reagerer på at Helse Midt-Noreg skal ha så dårleg tid.
– Ingen verdas ting er utgreidd. At ein investerer 40 millionar kroner i Ålesund, vil med reine ord seie at AMK-sentralen i Molde vert nedlagd.