- Eg er stadig på leiting etter fine motiv, vi har fjellrekka og vi har fjorden, og sommar som vinter er det like flott - og då er det lett å lage god film om naturen i området her, seier Trygve Berge.
Og naturen i Molde og Romsdal er fanga på sitt vakraste og mest spanande gjennom den 25 minutt lange filmen.
Dagar, veker og månader har gått med til opptak og redigering. Scener er også henta frå det rikhaldige arkivet Trygve Berge har opparbeidd gjennom meir enn 40 år bak kameraet.
Berge legg mykje vekt på å få bileta slik han vil ha dei, sjølv om det er mykje og krevjande arbeid.
- Eg forandrar litt på fargar for å få den rette stemninga i filmen slik at alt også passar til musikken. Dette er det som krev mest arbeid.
Trygve Berge har fått fleire prestisjefylte prisar for filmane sine. Han er også vide kjent for å ha dokumentert strabasiøse ekspedisjonar saman med eventyraren Ragnar Thorseth. Mellom anna var dei ilag til Nordpolen.
No er film-og tv- veteranen spent på korleis filmen om heimbyen og distriktet rundt blir motteken.