60 - 80 abonnentar står i fare for å vere utan vatn innan svært kort tid. Arild Nærø i vassverket seier at dette er dramatisk.
– Tilsynsmannen seier at det kan byrje å røyne på alt i morgon. Då er vasstanden komen så langt ned at vi rett og slett er vasslause, seier Arild Nærø til NRK.
– Skru att kranane
Med eit vassnivå 60 centimeter under det nederste inntaket må noko gjerast umiddelbart. Vassverket ber folk i Tafjord skru igjen kranane.
– Vi vonar at folk i Tafjord ser alvoret og brukar minst mogleg vatn. Ingen må bruke meir vatn enn det som strengt tatt er naudsynt, seier Nærø.
Tørr kuldeperiode
Tafjord ligg i ein av dei innerste fjordarmane på Sunnmøre. Her har det vore kaldt og svært lite nedbør. Dette betyr at det har kome minimalt med vatn til vassverket. Det bur i dag omlag 160 innbyggjar i bygda, ifølgje nettstaden Tafjord-portalen. Bygda er kjend for turisme, og ikkje minst fordi vassdraga i området er bygde ut til kraftproduksjon.
– Dusj kortare
Aril Nærø i Tafjord vassverk bed folk om å bruke vatn på ein slik måte at det kan bli litt til alle. Dette betyr at ingen i Tafjord må sløse med vatnet.
– Dei må gjerne gjere seg kort når dei dusjar. Vatnet må ikkje stå og renne i kjellarar, fjøs og uthus. Steng att kranane og skru heller på varme om de er redde for at det skal fryse, seier Nærø.