Den 20. januar i år døydde 52 år gamle Svein Arvid Strand, frå Sunndal, i ei paragliderulukke i Ålvundfjord i Sunndal.
Etter å ha teke av frå fjellet Vardhaugen skal 52-åringen ha landa svært hardt. Etter landinga skal han klaga over store smerter i ryggen.
– Etter at han tok av blir det opplyst at han landa i bakken, på ei fjellhylle. Vi har ikkje fått målt, men han skal ha ramla 20-40 meter.
Det fortalte operasjonsleiar Thorry Aakenes i Nordmøre og Romsdal politidistrikt den 20. januar.
- Les også:
- Les også:
«Feilvurdering» og «store tidstap»
Redningsoppdraget blei starta klokka 14.38, denne søndagen i januar. Klokka 16.20 blei mannen henta ut av luftambulansen. Mannen hadde då blitt erklært død på staden.
I etterkant har Statens helsetilsyn kravd ei utgreiing frå St. Olavs hospital i Trondheim. I utgreiinga etter dødsulukka har det vist seg at prosedyrar for koordinering av luftambulanse ikkje har vore god nok.
Det var Gudbrandsdølen Dagningen som først omtalte saka i papiravisa laurdag.
Tre AMK-sentralar var inne i redningsarbeidet, éin frå Helse Sør-Aust og to frå Helse Midt-Noreg. Det er dei sistnemnde som får kritikk.
«Feilvurdering», «store tidstap» og «upresis og mangelfull informasjon» er blant orda brukt i utgreiinga frå sjukehuset i Trondheim.
Var berre 10 minutt unna
For mannen frå Sunndal kunne ha blitt henta ut av fjellet tidlegare.
Luftambulansen frå Dombås var nemleg berre ti minutt unna ulukkesstaden. Men på grunn av dårleg kommunikasjon mellom naudetatane var ikkje luftambulansen der før éin og ein halv time etter ulukka.
Helikopteret hadde ein pasient om bord, men vedkommande kunne blitt flytta over i ambulanse då skada ikkje var veldig alvorlege.
Luftambulansen fekk aldri melding om dette. Det blei avgjort at pasienten som allereie var i helikopteret skulle leverast i Ålesund før same helikopter skulle til Ålvundfjord.
– Kan ha vore medverkande
I tillegg skulle redningshelikopter frå Hovudredningssentralen på Sola rekvirerast, men dette blei aldri utført.
Då luftambulansen var på plass i Ålvundfjord blei mannen erklært død på fjellhylla.
– Hendinga var alvorleg ettersom det dreiar seg om eit dødsfall der svikt i helsetenesta kan ha vore medverkande til utfallet, har Helsetilsynet sagt til alle involverte.
Det skriv Gubrandsdølen Dagningen laurdag.
I si eiga utgreiing skriv St. Olavs hospital at heile hendinga, frå start til slutt, er gjennomgått. Tiltak har blitt sett i verk for å hindre at tilsvarande svikt skal skje på nytt.
Prosedyrar for koordinering av luftambulansar og alarmering er endra, medan merking av telefonlinjer i AMK skal vere betra. AMK-sentralane har fått presisert at akuttlinjer skal brukast når akutte situasjonar skal meldast, samt instruert om å bruke konferanselinjer for å finne kva helikopter som kan vere raskast på plass.
Helsetilsynet har ikkje ferdigbehandla saka enno.
