Onsdag byrja det å brenne på avfallsplassen på Jarnes i Sykkylven. Brannen tok til i nokre containerar med restavfall. Brannvesenet fekk sløkt brannen, men det blussa opp igjen natt til fredag.
– No er brannen sløkt og det er ingen røykutvikling, seier Arnfinn Klausen ved 110-sentralen.
Eigarane av anlegget skal gå vakt heile døgnet i tilfelle brannen blussar opp att. Brannslangane og alt naudsynt utstyr ligg klart, men brannvesenet har avslutta jobben.
Grunnen til at det har tatt så lang tid å sløkke brannen er at brannvesenet ikkje har kome inn i kjernen av søppelhaugane, men berre sløkt på overflata. Dermed har det blussa opp att.