– Denne aksjonen er ulovleg

I natt møtte bønder opp med traktorane sine utanfor trykkeriet til Sunnmørsposten i Breivika i Ålesund. Dei sperra utkøyringa av aviser frå trykkeriet, fordi dei var misnøgde med avisa si dekning av bondeaksjonane førre veke.

• Bønder blokkerte Sunnmørsposten

Ulovleg

Ansvarleg redaktør i Sunnmørsposten, Hanna Relling Berg, seier at bøndene sin aksjon er heilt uakseptabel.

– Dette er ulovleg. Men det som er bra er at vi har ein dyktig distribusjon, som likevel klarte å få ut avisa, seier Relling Berg. Ho trur dei aller fleste lesarane vil få avisa til vanleg tid.

Brei dekning

Forstår du at bøndene er skuffa over dekninga til Sunnmørsposten?

– Eg forstår at dei ynskjer merksemd, men vi har hatt ei brei dekning av denne aksjonen. Tysdag hadde vi ein reportasje over to sider om bondeaksjonen, der dei fekk kome fram med krava sine. Vi har også hatt fleire heilsider der bøndene har fått kome til orde med sine synspunkt, seier redaktøren.

Ho tilbakeviser at ho ikkje likar bondenæringa, slik som bøndene hevdar.

SJÅ VIDEO:

Skuffa over avisa

Talsmann for bøndene, Odd Einar Fjørtoft, seier dei er skuffa over Sunnmørsposten.

– Bønder på Sunnmøre vart overraska og sinte over at regionavisa som vi abonnerer på, ikkje dekte aksjonen som bøndene hadde på tysdag, seier Fjørtoft.

LES OGSÅ:

• Bøndene sa nei til 17.000 kroner i inntektsvekst
• – I nokre bygder er der rett og slett ikkje gardsbruk att
• Valforskar: bondeaksjon er taktikk

Mislikar leiarartiklane

Han og dei andre bøndene hadde forventa at dei skulle få sjå bilete frå aksjonen i onsdagsutgåva av avisa. Då det ikkje sto noko, bestemte bøndene seg for å gå til ny aksjon.

– Vi veit at vår avis ikkje er spesielt positiv til oss, det viser redaktøren sine leiarartiklar, seier Fjørtoft.