Sunnmøre politidistrikt fekk inn melding klokka 14.10 om ein bil som hadde køyrt av vegen.
– Den har køyrt av vegen i Barstadvik ved Vartdalsfjorden. Det er uvisst om nokon er skadd, sa operasjonsleiar Ole Bjørn Harang til NRK klokka 14.40.
Alle naudetatar rykka ut til ulukkesstaden i Ørsta kommune.
– Ikkje køyrbar
Litt seinare kan Harang fortelje at det var tre personar i bilen.
– Vi har ikkje indikasjonar om personskade, men vi vil gjerne at helsepersonell skal få prata skikkeleg med dei. Det er tre personar, alle utanlandske.
Personbilen dei tre sat i er derimot nær totalskadd.
– Bilen er veldig skadd, ikkje køyrbar, slår Harang fast.
Kunne blitt alvorleg
Etter at helse hadde sjekka dei tre personane kunne politiet vidareformidle at dei kom frå ulukka utan skadar.
– Eg kan stadfeste at det ikkje er personskadar. Det har vore eit uhell der bilen køyrde av vegen, blei slengt inn igjen og i autovernet. Dei tre i bilen har vore veldig heldige, seier Harang til NRK.
Han fortel at autovernet truleg redda liv.
– Autovernet hindra at bilen forsvann langt av vegen. Det kunne blitt ei langt meir alvorleg ulukke.
Operasjonsleiaren opplyser til NRK at trafikken flyt fint på staden.
– Når vi får fjerna bilen så avsluttar vi på staden, seier Harang.