Gigantarrangementet Stordalscup har fått 8000 menneske til å dra til Stordal på Sunnmøre denne helga.
Fotballcupen for barn blir arrangert for 35.gong. Og der har dei ein fast tradisjon:
– Sola kjem samtidig med cupen. Kvart år, seier cupsjef Bjørg Jacobsen, som ser mange solbrente folk på fotballbanen.
Ho har fortrengt at det var haglbyger i fjor. Cupsjefen seier at Stordalscup set sitt preg på kommunen frå fredag til måndag.
Åtti lag er med i cupen, og det er 8000 besøkande. Dette gir inntekter.
Stordalingane stiller på dugnad
– Det er den suverent største inntektskjelda til fotballgruppa i Stordal IL. Det gjer at vi slepp å seljje så mykje lodd elles i året.
250 stordalingar er med og hjelper til. Mange av dei har ikkje barn i aksjon sjølve, men gjer likevel ein solid dugnadsinnsats.
Loppemarknad, valkamp og tivoli
Kampane blir spelte på seks baner. Stordal har eit flott kunstgrasanlegg, og i Stordalshallen like ved er det mykje som skjer. Inne i grendasalen er det loppemarknad. Det er kafé og mange utstillarar. Fem politiske parti har valkamp i hallen, og ute er det tivoli.
Bjørg Jacobsen arbeider til dagleg som leiar for Frivilligsentralen i Stordal. Og cupen er litt i same gate, så her kan ein ta med seg erfaringar begge vegane.
– No kryr det av folk overalt. Dette er moro, seier Bjørg Jacobsen, leiar for den 35. Stordalscup.