– Vi er sikre på at det er snakk om ei valdtekt, fortel politiinspektør i Sunnmøre politidistrikt, Elin Drønnen.
Sunnmøre politidistrikt er no sikre på at det dei står overfor er ei valdtektssak, etter at ei eldre kvinne i Sula kommune vart utsett for vald og overgrep i heimen sin ein gong mellom 19.30 onsdag 15. juli og 08.30 torsdag 16. juli. Drønnen fortel at politiet ser alvorleg på saka.
– Politiet ser veldig alvorleg på saka, den har høgaste prioritet hjå oss og vi har henta inn bistand frå Kripos i saka. Vi har gjort både tekniske og taktiske undersøkingar og henta inn tekniske spor. Foreløpig har vi ikkje fått svar på DNA-prøvene vi har sendt inn i saka, men vi håpar å få svar i løpet av veka.
- Les også: Har hentet inn overvåkningsvideo
Ber om tips
Politiet ønsker tips frå publikum i den aktuelle tidsperioden mellom kvelden den 15. juli og morgonen den 16. juli, i tillegg til perioden før det aktuelle tidsrommet. Drønnen fortel at dei vil ha opplysningar om bevegelsar i området rundt Fiskarstrand og Mauseidvåg.
– Vi ber dei som har tips til oss om å ta kontakt på telefonnummeret 02800. Vi ønsker observasjonar av bilar, personar og andre ting som kan vere aktuelt i saka. I tillegg vil vi ha opplysningar om bevegelsar på strekninga frå Mauseidvåg til Fiskarstrand, turstien langs Raudåvatnet og fylkesveg 657.
- Les også: Ønsker tips i mulig overgrepssak
