Sidan slutten av 90-talet har Stortinget hatt som mål å få 20 prosent mannlege tilsette i barnehagane. Men lite har skjedd. Talet er framleis under 10 prosent.
- Les også:
– Kampanjar må til
Trass i mange kampanjar dei siste åra har altså ikkje kjønnsbalansen i barnehagane blitt betre. Leiaren i Utdanningsforbundet, Mimi Bjerkestrand, meiner likevel at kampanjar er nyttige i det langsiktige arbeidet.
– For det første så handlar det om å vise fram betydninga av barnehagen som arbeidsplass, og betydninga barnehagen har for ungane våre. Det andre er heilt klart å løfte arbeidsvilkåra og lønsvilkåra for førskulelærarane, slik at det blir attraktivt for fleire, seier Bjerkestrand.
Les også:
10 000 har droppa yrket
Tal frå Utdanningsforbundet viser at 10 000 personar som er utdanna førskulelærarar, ikkje arbeider som det. Det er også gitt 7000 dispensasjonar frå kravet om førskulelærarar i barnehagane.
Bjerkestrand avviser at Utdanningsforbundet har gjort ein for dårleg jobb med å heve løns- og arbeidsvilkåra for førskulelærarane.
– Å løne og tilsette arbeidstakarar i dette landet er arbeidsgjevarane sitt ansvar. Så både rekruttering, og lønsforholda må arbeidsgjevaren ta ansvaret for. Vi har stilt offensive krav, men vi har ikkje lukkast godt nok med å få opp førskulelærarløna, seier ho.
Meir attraktivt
Bjerkestrand presiserer at førskulelærarane si løn bør opp uavhengig av om det vil få fleire menn til yrket.
– Det er ikkje difor vi kjempar for betre løn til førskulelærarane, men dersom løna blir betre, vil yrket bli meir attraktivt for fleire, seier ho.
Forhandlingsleiaren for kommunane i KS, Hege Mygland, seier til NRK at dei no førebur vårens lønsforhandlingar. Dei kommenterer difor ikkje utspel om løn i media på denne tida av året.
To nye kampanjar
Kampanjane og handlingsplanane har vore mange opp gjennom åra. Men talet på mannlege førskulelærarar held seg stabilt på under 10 prosent.
I den nye handlingsplanen til regjeringa, «Likestilling 2014», er eit av tiltaka å opprette fylkesvise likestillingsteam for å rekruttere og halde på menn i barnehagane. I tillegg startar i desse dagar kampanjen «Verdens fineste stilling ledig».
– Det er sett av 25 millionar til kampanjen som i første omgang skal vare i 3 år. Rekrutteringskampanjen rettar seg først og fremst mot unge utdanningssøkande, men skal også jobbe for at fleire assistentar skal bli motiverte til å ta utdanning. To viktige undergrupper i kampanjen er menn og personar med fleirkulturell bakgrunn, seier statssekretær Roger Sandum (SV) i Kunnskapsdepartementet.
– Feil at det ikkje er blitt fleire menn
Kunnskapsdepartementet meiner det er feil å seie at det ikkje er blitt fleire menn i barnehagane siste åra.
– Sjølv om barnehagesektoren har vorte betydeleg større, har talet på menn vore stabilt på rundt 8 prosent. I realiteten betyr dette ein vekst, seier Sandum.
– Frå 2009 til 2010 var det for eksempel 470 fleire menn som starta i barnehage. Tar ein med vaktmeistrar og anna personale er rundt 10 prosent av alle tilsette i barnehagane menn. Dette er berre halvvegs til målet, men Noreg er likevel det landet som har fått best resultat samanlikna med EU-landa, seier statssekretæren.
– Kan regjeringa bidra til at løna i barnehagane aukar slik at det blir meir attraktivt å jobbe der?
– Løns- og arbeidsvilkår er først og fremst partane i arbeidslivet sitt ansvar. Regjeringa kan ikkje gripe inn i partssamarbeidet. Men vi kan bidra til å heve status og interesse for det viktige arbeidet i barnehagane, seier Roger Sandum (SV) i Kunnskapsdepartementet.