På Nyhamna i Aukra står det eit gasskraftverk i beredskap. Ifølgje retningslinene skal det berre brukast når det er alvorleg kraftmangel. No tek ordførar i Aukra, Bernhard Riksfjord, til orde for å ta i bruk reservegasskraftverket om det tek lang tid før den nye kraftlina blir ferdigstilt.
– Alle skjønar at vi treng store mengder med energi. Vi har aluminiumsverket i Sunndal, vi har Hustadmarmor, Ormen Lange og Aasta Hansteen-feltet. Og vi må finne på noko før den nye kraftlinja er ferdig, seier Riksfjord til NRK.
- Les også:
Den nye kraftlina skal føre elektrisk kraft frå Vestlandet til Møre og Romsdal. Men arbeidet i Sogn og Fjordane har stoppa som følgje av ein dom som seier at trasévalet gjennom Myklebustdalen i Bremanger er gjort på feil grunnlag.
- Les også:
- Les også:
Dette gasskraftverket har stått på Nyhamna sidan 2009. Men på grunn av forureininga frå verket kan det ikkje brukast utan særskilt løyve.
Foto: StatnettIfølgje Statnett vert det meir og meir sannsynleg at reservegasskraftverket blir teke i bruk etter kvart som spriket mellom tilgang og behov for kraft aukar.
– Forbruket aukar i 2016. I tørre år med låg magasinfylling vil dette auke sannsynlegheita for at reservekraftverket må takast i bruk, seier kommunikasjonssjef Martha Hagerup Nilson.
- Les også:
Etter planen skulle den nye kraftlina stå ferdig i 2016. Framleis er det uvisst kor mykje lina blir forseinka. I løpet av 2016 kjem det ein kraftig auke i kraftbehovet i Møre og Romsdal. Då er nemleg utbygginga på Nyhamna ferdig.
– Vi kan ikkje seie at det er krise samstundes som vi har eit gasskraftverk ståande. Det ville vere det same som at vi ikkje vil ta i bruk dei verkemidla som ligg til rette, seier Riksfjord.
Det er Statnett som eig reservegasskraftverket i Aukra. Det er på 150 MW, og blei bygt i 2009 for å hindre kraftmangel i Midt-Noreg. CO2-utsleppet er på 2450 tonn kvart døgn. Dette er årsaka til at Statnett må søkje Olje- og energidepartementet om å få lov til å bruke det.
