I går kunne På dyras side melde at det vietnamesiske hengebuksvinet Porky står i fare for å bli slakta av skotske styresmakter på grunn av munn- og klauvsjuka. Eigarane til Porky, pensjonistparet Sadie og George Stone, har halde grisen innandørs i fleire dagar i frykt for at styresmaktene skal hente han.

Eigarane til Porky nyttar sivil ulydnad for å redde grisen.

Ber om medkjensle

Sadie og George Stone har fått uventa hjelp frå Brigitte Bardot. Ho etterlysar medkjensle med grisen, og ber styresmaktene vurdere saka om att.

Dei skotske veterinærstyresmaktene har avgjort at alle grisar i område med munn- og klauvsjuke skal avlivast. No nektar Sadie og George å opne døra i frykt for at Porky skal bli henta med makt.

– Både Phoenix og Porky må få leve!

Phoenix slapp unna nedslaktinga. No håpar Bardot at Porky òg får leve. Foto: BBC

Bardot håpar Porky vil bli behandla på same måte som kalven Phoenix. – Den 13 dagar gamle kalven vart funne nedst i eit bål med daude kyr fleire dagar etter at mora vart drepen og brent. Kalven vart ein nasjonalhelt i Storbritannia, og det kom folkekrav om å spare han. Regjeringa gav etter og lot Phoenix leve, og no håpar altså Bardot at dei vil gjere det same for Porky.

– Vi var takknemmelege for medkjensla regjeringa viste for Phoenix, og no ber vi om at Porky òg blir spart, seier informasjonsrådgjevaren til Bardot. Alt for mange friske dyr har blitt ofra i Storbritannia allereie, no er det på tide å stoppe og tenkje seg om, held ho fram.

Blir truleg avliva

Det er lite truleg at Porky vil bli spart – trass i at superkjendisen ber om det. Til no har korkje den britiske regjeringa, Landbruksdepartementet eller den skotske regjeringa vore viljuge til å gjere eit unntak for Porky.

Se også