– Løftebrot frå kulturministeren

Musikernes Fellesorganisasjon (MFO) hevdar at partane er samde, og at det er kulturminister Anniken Huitfeldt som set ein stoppar for avtalen.

Men motparten Spekter seier derimot at dei ikkje er samde med MFO. Dei opplyser at årsaka til at ein ikkje har kome fram til nokon avtale, er at orkestra ikkje har økonomi til å takle lønnstillegget på 33.000 kr.

Kulturminister Anniken Huitfeldt har ikkje tidlegare ynskt å kommentere streiken, men i dag uttalte ho seg for første gong om konflikten.

– Det er spesielle reglar for korleis ein handsamar ein arbeidskonflikt, det er akkurat dei same reglane i kulturlivet som i resten av samfunnet. Difor kan eg ikkje kommentere dette yttarlegare i media. Ein eventuell kontakt må gå føre seg mellom partane som i alle andre arbeidskonfliktar, seier Anniken Huitfeldt.

• LES ÒG: Begge parter beklager operastreiken
• LES ÒG: Operaen avlyser fra dag til dag

Krev 33.000 kr

Dei fagorganiserte i Musikernes Fellesorganisasjon (MFO) på Den Norske Opera & Ballett kjenner seg forbigått og urettferdig behandla. Dei gjekk ut i streik då dei ikkje fekk gjennom ein avtale som skulle gje dei det same tillegget som kollegaene ved orkestra i Bergen, Stavanger og Trondheim fekk i fjor.

Etter planen skulle utøvarane ved Den Norske Opera & Ballett, Kristiansand Symfoniorkester og Blåseensemblet i Halden få ein tilsvarande lønnsauke på 33.000 kroner i år.

Det var dåverande kulturminister Trond Giske (Ap) som gav løftet om lønnsauken. Men i april gav Anniken Huitfeldt beskjed om at prosessen for dei siste tre verksemdene framleis ikkje var godkjent.

– Forhandlingane har pågått sidan 2006, eg har sjølvsagt hatt nær dialog med Giske om dette. Vi har felles oppfatningar og haldningar i denne saka, seier Anniken Huitfeldt.

– Kvifor får dei ikkje tillegget då?

– No har saka hamna i streik og då er det ikkje naturleg for meg å kommentere dette ytterlegare. Kontakten må skje mellom partane.

– Løftebrot frå kulturministeren

I morgon vert streiken trappa opp, då går seks dansarar til ved Den Norske Opera & Ballett ut i streik. Ballettdansar og tillitsvald for Nasjonalballetten, Marek Jaz er ein av ballettdansarane som skulle ha stått på scena i Askepott.

– Vi synest at heile konflikten er utruleg trist, at vi må avlyse framsyningar, seier Marek Jaz.

Han meiner at kulturministeren har lovd dei tillegget på 33.000 kroner, og trur det som må til er at kulturministeren kjem i dialog med partane.

– Kulturministeren sit med løysinga på det heile.

Operaen taper ein halv million kroner dagleg på streiken, og har til no avlyst framsyningane av Jorden Rundt på 80 dager og halvparten av dei planlagde framsyningane av Askepott-balletten. Ei opptrapping i morgon fører til avlysing av alle Askepott-framsyningane.