Fredag vart det offentleggjort at Decca Classics, som er eigd av Universal, har skrive ein eksklusiv platekontrakt med Valentina Lisitsa.
– Hadde aldri klart dette utan mine fans på nettet
Den første Decca-utgjevinga med pianisten vert ein konsert-cd frå debutkonserten hennar i London, som finn stad i Royal Albert Hall 19. juni.
Konserten vert overført direkte på internett, og fansen får også vere med på å stemme fram kva ho skal spele.
– Eg hadde aldri klart dette utan mine fans på nettet over heile verda, seier Lisitsa i ei pressemelding.
– Reaksjonane deira fortel meg kvar dag at eg gjer det rette, og det er den beste løna eg kan få for det harde arbeidet. No vil eg takke dei og gi dei ein flott livekonsert online.
Les:
Sjå Valentina Lisitsa spele frå Beethovens «Måneskinssonate»:
– Når ut på ein moderne og umiddelbar måte
Valentina Lisitsa er fødd og oppvaksen i Ukrainas hovudstad Kiev, og det var også der ho utdanna seg til pianist – trass i at jentedraumen var å verte sjakkspelar. Ho flytta til USA i 1991 og har sidan gitt ut fleire cdar, sjølvfinansierte eller på mindre selskap, mellom anna to saman med pianistektemannen Alexei Kuznetsoff.
På vegen mot dagens stjernestatus har ho også utmerkt seg som kammermusikar: I 2011 spelte ho inn musikk av Charles Ives saman med fiolinisten Hilary Hahn på eit anna prestisjemerke, Deutsche Grammophon.
Det mest suksessrike steget i karrieren var nok likevel då ho oppretta sin eigen YouTube-kanal i 2007.
– Valentina er verkeleg ein unik artist, seier Paul Moseley i Decca Classics.
– Hennar ry på YouTube er genuint og velfortent, og vi er stolte over å jobbe med henne medan ho når ut til store mengder klassiske fans på ein moderne og svært umiddelbar måte.
Sjå Valentina Lisitsa og Hilary Hahn spele Charles Ives: