Teikna kronprinsessa inn i Donald

– Det har vore ei stor ære å få «ankifiera» (journ.anm. «donaldfisere») kronprinsessa før hennar store dag.

Det seier bergensar og teikneserieteiknar Arild Midthun til Svensk Damtidning – vekebladet som først melde om teikneoppdraget. Til NRK seier Midthun at han dei siste vekene har vore tungt inni det rojalistiske landskapet.

– Eg teikna dronning Sonja i høve hennar 80-årsdag, samstundes med at eg teikna kronprinsesse Victoria for Kalle Anka. Eg har følt meg ganske rojalistisk, ja, flirer han.

Foreløpig får vi berre sjå korleis framsida av den komande Kalle Anka-utgåva ser ut. Der ser vi ein syngande Donald Duck, som karakteren heiter på norsk, hoppe ut av ei blautkake – noko som ser ut til å gle kronprinsessa.

• Les også: Donald har vært på Vega-besøk, og her er den første skissen

Prinsessa med i prosessen

For det svenske kongehuset har hyllesta i teikna form blitt tatt godt i mot.

– Det er ein kul og positiv gratulasjon, seier Margareta Thorgren, informasjonssjef ved det svenske hoffet til Expressen.

Prosjektleiar for Kalle Anka & Co., Anna Bergström, seier til Svensk Damtidning at prinsessa sjølv har vore deltakande når ho blir ein del av Kalle Anka-universet.

– Ho har fått vere med på heile prosessen og godkjent frå skisse til fargelegging, fortel Bergström til vekebladet.

Midthun seier til NRK at prosessen har vore overraskande enkel.

– Det er alltid nokre rundar med godkjenning når store aktørar er med, men dette gjekk overraskande raskt og enkelt. Kongehuset har vore veldig positive.

• Les også: Donald Duck må på «avrusning»

Lurte inn detaljar

Teiknaren, som har teikna for Donald Duck & Co. sidan 2004, fortel at han har lurt inn ekstra detaljar i teikninga med kronprinsessa.

– Eg lurte faktisk inn monogrammet hennar. Ein finn det ein stad på kaka. Elles er alle smykke, tiaraen og kjolen ting ho verkeleg har gått med, seier Midthun.

For han er detaljane spesielt viktig i slike samanhengar.

– Det er nesten viktigare at detaljane stemmer enn at teikninga er heilt lik personen, meiner Midthun.

Zlatan, Reinfeldt og Carlsen

I svenske Kalla Anka har mellom andre fotballspelar Zlatan Ibrahimovic og tidlegare statsminister Fredrik Reinfeldt blitt karikert av Midthun.

I den norske utgåva av bladet har Donald-superfan Magnus Carlsen blitt teikna av Arild Midthun.

– Det er morosamt. Eg har vore Donald-fan i alle år, og det er ikkje alle som får vere ein del av si eiga teikneserieverd, sa Carlsen til NRK i 2014.

Medan kronprinsesse Victoria berre har fått eit andenebb, blei Carlsen teikna som ein hund i Andeby.