– Hør på dette her – finst det ein vakrare melodi?, spør Leif Ove Andsnes og legg henda på dei kvite tangentane.
44-åringen har berre tid til ein snarvisitt innom heimen i Bergen, før han legg ut på siste etappe av Ludwig van Beethoven-reisa. I tre år har musikken til den tyske komponisten fylt han heilt.
– Eg er på ein måte i det, i eitt fokus. Det er utruleg herleg å la tankane berre fara.
Redd for å gløyma
Siste plate i Beehoven-prosjektet kom ut i dag, med den femte pianokonserten til den tyske komponisten. Det som står att for Leif Ove Andsnes no er ein lang turné til somme av dei største konserthusa i verda.
– Dette er den mest utfordrande etappen. Eg har klatra opp eit fjell, og det er den siste stigningen igjen. Den som går rett opp.
- LES OGSÅ: |
På denne turneen skal alle dei fem pianokonsertane til Beethoven framførast. Andsnes innrømmer at det er ambisiøst.
– Eg spelar jo alt utan notar og leiar orkesteret samstundes. Memoreringa er alltid noko ein er redd for. Redd for at ein skal gløyma.
– Grugledar meg
Denne etappen av prosjektet byrjar i Hamburg i Tyskland 24. september. Så tek Andsnes turen til Beethovens fødeby, Bonn, og gjer tre konsertar der. Deretter går det slag i slag (sjå turnèplanen her). Heile turneen vert avslutta i juli 2015 i London.
– Det blir ein milepæl for meg, det å spela så mange forskjellige og store stykke på ein gong. Eg grugledar meg, smiler Andsnes.
– Vi treng Beethovens musikk i dag
Beethoven levde frå år 1770 til 1827, i ei tid med enorme omveltingar i Europa. Då prosjektet til Andsnes byrja i 2011, skildra han komponisten sine verk som «musikk som passar i vår tid».
Det held han framleis fast ved.
– Han levde for 200 år sidan, men skriv musikk som i alle fall eg oppfattar nærast som healing. Musikk snakkar til publikum. Beethoven går til mørke og lyse stader, men det er alltid ein optimisme. Han såg oppover, skildrar Andsnes.
– I dag kan du opna ei nettavis og vere to klikk unna å sjå ei halshogging. Eg trur me treng optimismen og lyset som Beethoven, mirakuløst nok, kan gi oss.
Gode mottakingar
Andsnes seier han som pianist har svært mykje å velja mellom. Han meiner det difor er fint å kunne avgrensa seg til ein nokre år.
– Eg har mange århundre med musikk å velja mellom. Så då vart det slik; no tek eg tre-fire år og spelar berre ein komponist. Det trur eg at eg har vakse på.
Og mottakingane har vore gode.
– Men blir du ikkje lei av Beethoven?
– Eg blir lei av å øva på han, det skal eg innrømme, ler Andsnes.
– Men så møter eg eit orkester, eit publikum og går igjen inn på scena. Med eitt er musikken hans spontan og seier meg så mykje. Det er fantastisk musikk å jobba med.
I Norge kan du oppleva Andsnes saman med Nordnorsk Opera og Symfoniorkester i Bodø og Tromsø i november. I januar 2015 spelar han saman med Filharmonien i Bergen i Grieghallen, medan han vitjar Olavshallen i februar saman med Filharmonien i Trondheim.
Høyr klipp frå Leif Ove Andsnes si nye plate: