– Tilbakemeldinga frå kompisar betyr mest

Med akustisk gitarkonsert i parkeringskjellaren under Youngstorget i Oslo lanserer Jo Nesbø ein ny bokserie denne veka.

Og vi kan sjå langt etter Harry Hole.

• MELDING: «Blod på snø»

Førehandsselt til 22 land

Olav Johansen heiter den nye hovudpersonen til Nesbø. Han er leigemordaren som altfor lett blir forelska.

Handlinga i boka er blant anna lagt til eit fiskeri på Youngstorget, der ein av byens store narkobaronar driv omfattande heroin-verksemd.

«Blod på snø», som krimromanen heiter, er alt førehanddselt til 22 land.

– Det er alltid ein brå og rar overgang å gje ut ei bok. Eg har levd på 70-talet ei god stund nå, saman med leigemordaren Olav Johansen og «Fiskern». Og det er alltid ein brå overgang plutseleg å ta eit slikt univers ut til folk, seier Nesbø.

• LES: Nesbø skriv «jævlig dårleg bok» utan Harry Hole

Måtte legge seg i selen for å skrive dårleg

Den nye serien er «liksom» skriven av den oppdikta forfattaren Tom Johansen, som hadde si stordomstid på 70-talet.

«Blod på snø 2. Mere snø» kjem til hausten. Det er den «ordentleg dårlege oppfølgjaren» til «Blod på snø».

Jo Nesbø måtte dermed skrive ei så dårleg bok som ein avdanka krimforfatter på 70-talet ville gjort.

– Det er jo litt kjedeleg å vakne opp om morgonen å tenke at i dag skal eg skrive ei bok som ikkje er spesielt god, seier han.

– Nokre dagar fekk eg skikkeleg sving på sakene slik at det eg skreiv blei ordentleg dårleg. Andre dagar mista eg konsentrasjonen og skreiv altfor godt, fortset han.

• LES: Molde fikk cupfinalesang av Nesbø

Prøver å imponere to kamerater

Uavhengig av korleis bøkene i den nye krim-serien slår an blant publikum – det som betyr mest for Nesbø, er tilbakemeldingane frå to kompisar.

– Korleis har dei teke i mot boka?

– Dei veit jo ikkje at det er dei eg skriv for. Viss dei les boka, så kan dei til dømes kome til meg og seie at den var «alright». Då er eg veldig fornøgd, seier Nesbø.

– Men dei er veldig strenge. Dersom boka ikkje er bra, får eg sannsynlegvis aldri høyre noko, legg han til.

LES OGSÅ:

• Jo Nesbøs kortfilm «Konto og gitar»
• Anmeldelse av Nesbøs «Sønnen»
• Nesbø stadig mer populær på engelsk