Aktor fekk fullt medhald i saka mot Odd Nerdrum. Dommen er einstemmig og forholdet blir karakterisert som grovt skattesvik.
Forsvarar Tor Erling Staff vil anke dommen, ifølgje NTB.
Den verdsberømte kitsch-målaren var tiltalt etter Likningslova paragraf 12. Påtalemakta hevda at Nerdrum selde måleri for over 14 millionar kroner som han ikkje skatta for i perioden 1998 til 2002. Retten meinte han hadde lurt unna 10,4 millionar kroner.
Strafferamma for slike lovbrot er opptil seks års fengsel.
Aktor Asbjørg Lykkjen la ned påstand om to år ubetinga fengsel og fekk fullt medhald. Kunstnaren må også betale sakskostnadane på 10.000 kroner.
– Påtalemakta si oppfatning av dommen er at den er nøye vurdert, bra grunngjeve og ein riktig dom. Beløpet som er forsøkt skjult og måten det er gjort på gjer dette til ei alvorleg straffesak med mulige store økonomiske gevinstar, seier Lykkjen til NRK.
Er i utlandet
Ein eventuell straffeskatt blir fastsett av Skatteetaten, men det vil først skje ved ein rettskraftig dom, etter anken.
LES:
Etter det NRK erfarer er Nerdrum for tida i Louvre med assistentar og elevar, der han fekk beskjed om rettsavgjerda. Ankefristen er 14 dagar etter at han har mottatt dommen i posten og kvittert for den.
Hovudpersonen vil ikkje uttale seg til media og held fram med sin mediaboikott, som han starta i 2002.
Forsvararen har ikkje snakka med klienten sin enno onsdag ettermiddag.
– Eg har sjeldan lest ein så bastant dom som levnar så lite rom for tvil. Når i tillegg vesentlege poeng er utelatt, så er vi ikkje strålende fornøgd, seier Staff til NTB.
Festa ikkje lit til forklaring
Straffesaka gjekk føre seg i Oslo tingrett tidlegare i månaden og dommarane har brukt to veker på å ta avgjerda.
Nerdrum og hans forsvarar, Tor Erling Staff, hevda at pengane skulle brukast til erstatningskrav for måleri som er blitt øydelagt.
Retten har ikkje festa lit til denne forklaringa, står det i dommen. Ved bevisvurdering har dei lagt vekt på at Nerdrum har hatt ulike forklaringar gjennom åra når det gjeld sjekkane frå Galleriet.
«Retten finn det bevist utover einkvar rimeleg tvil at den einaste hensikta med å plassere kontantar i ein bankboks i Austerrike var å unndrage desse inntektene frå skatting i Noreg», står det i dommen.
– Kunstnarmyten avgikk ved døden
– Det er den største norske kunstnaren som er tatt i skattesvindel. Kunstnarmyten avgikk ved døden i dag. Forsvaret spelte på at det er ei eiga diagnose å vere kunstnar, men Nerdrum vart likevel felt, meiner NRKs kulturkommentator Agnes Moxnes.
LES KOMMENTAR: Odd Nerdrum og kunstnermyten
Ho meiner dommen er sterk og at den tydeleg seier at Nerdrum bevisst har lurt unna pengar.
– Retten meiner at Nerdrum har lagt ned betydeleg arbeid i å lure unna pengar i bankboksen. Normalt ville det nesten vore umogleg å finne den, seier ho.
– No vil verda dele seg i to: Dei som meiner at dette er ei framleis demonisering av Nerdrum og dei som står på den andre sida. I retten var det tydeleg at Nerdrum hadde valt å leggje vekt på at dette var ei demonisering av han, og at tvilen kom staten til gode, som han sa.
Kalla tiltalen «tøys»
I forsvaret la Staff vekt på at kunstnaren har Tourettes syndrom. Dette har retten tatt stilling til i spørsmålet om subjektiv skuld og den legg ei viss vekt på at Nerdrum har ein sjukdom som kan gjere det vanskelegare for han å sone enn for andre.
Men retten finn det bevist at han også har eit bevisst forhold til dei inntektene hans kunst generer.
Nerdrum kalla tiltalen «tøys» då han møtte i retten 2. august. Han avbraut retten fleire gongar.
– Det pågår ei demonisering av meg. Det er farleg og skummelt. Eg har alltid tenkt at den norske stat ville ta livet av meg. Eg trur det er ein måte å dytte meg inn i sjølvmordet, sa kunstnaren.
LES: