Medan heile det kongelege europa sit til bords i København og skåler for dronning Margrethe, debuterer dronning Sonja som kunstnar i New York.
Veggane i galleriet i Park Avenue sentralt på Manhattan er kledde med grafiske verk med kongeleg signatur. I tillegg til arbeid av andre kunstnarar knytte til Queen Sonja Print Award.
– Det er spennande. Det er klart ein har sånne små … inne i seg. Butterflies heiter det, smiler dronninga.
- Les også:
Aha-stjerne og grafikar
Dronninga viser eit lite knippe journalistar rundt i utstillinga «Prize Prints, the Queen Sonja Print Award». I bakgrunnen står Magne Furuholmen, Aha-stjerne og grafikar. Han er henta til styret i kunststiftinga og skal bidra til å gjere kunstprisen Queen Sonja Print Award internasjonal.
– Det er et utruleg sjenerøst initiativ av dronninga, seier Furuholmen om stipendet som er etablert for å løfte fram unge, lovande grafikarar.
Furuholmen har sjølv vore grafisk kunstnar i 25 år.
I 20 år har Magne Furuholmen arbeidd med grafiske verk i trykkeriet til Ole Larsen i Helsingborg. No er begge med på å gjere dronning Sonjas kunstprosjekt internasjonalt.
Foto: Henrik Myhr Nilsen / NRKVerdas største
Eit par etasjar under galleriet heng to verk av Magne Furuholmen. Dei har han gitt stiftinga for å bidra til å auke kapitalen. Å gjere prisen til verdas største grafiske pris kjem til å koste pengar.
– Eg har donert to verk så langt og eg reknar med det blir meir. Det gjer eg som ei støtteerklæring til stiftinga, seier Furuholmen.
– Grafikk har fått ufortent lite merksemd dei siste 20 åra. Det har endra seg no. Prisen vil løfte grafikken endå meir og hjelpe unge grafikarar vidare i karrieren, seier Furuholmen.
- Les også:
Markant pris
– Vi trur det er naudsynt å satse internasjonalt for å få meir blest om og støtte til prisen. Vi har ambisjonar om å styrke den finansielle sida innan 2020, seier dronning Sonja.
Lanseringa i New York i kveld er også eit frieri til potensielle støttespelarar i det internasjonale kunstmiljøet. Stiftinga håper fleire kunstnarar vil donere verk som kan generere fleire inntekter. Magne Furuholmen trur prosjektet vil lukkast.
– Dronninga har vore svært flink til å knytte til seg solide kunstnarar gjennom eit langt liv og etter kvart formalisert samarbeidet. Eg trur dette vil vere ein markant pris på samtidskunstscena, seier Furuholmen.
Danske Svend-Allan Sørensen vann stipend frå Dronning Sonjas kunststifting i fjor. No har dronninga og Sørensen laga eit verk saman til utstillinga «Prize Prints».
Foto: Henrik Myhr Nilsen / NRKSkal stille ut med dronning Margrethe
På grunn av den lenge planlagde kunstlanseringa i New York kunne ikkje dronning Sonja feire si gode venninne og kollega også i kunsten, dronning Margrethe, i København i kveld. Men til sommaren tek ho det att, då skal dronningane stille ut saman i Rosendal. Det gleder dronning Sonja seg til.
– Det blir heilt annleis enn dette, seier dronninga og ser seg kring i galleriet.
– Dronning Margrethe har malerier, eg har grafiske trykk, så det blir helt annleis. Men eg trur det blir fint det også.
- Les også:
