Seniorkurator ved Nasjonalmuseet for kunst, arkitektur og design Anne Kjellberg er svært lukkeleg over at dei kan stille ut antrekka Spook har donert til museet.
- Dette er ein draum som vart verkeleg. Det er ikkje ofte ein opplever noko slikt som museumskurator. Det er heilt unikt, seier Anne Kjellberg.
- HØYR SAK FRÅ OPNINGA:
- SJÅ DOKUMENTAR OM PER SPOOK:
Viktig kulturhistorie
Dei 20 kreasjonane vert synt fram i glasmontrar på Kunstindustrimuseet. Lyset er dust for å verne dei skjøre materiala, tekstilane toler nemleg ikkje for mykje lys, fortel designaren sjølv.
Per Spook har vore framsynt nok til å ta vare på enkelte av kleda han har laga mellom 1977 til 1994. Kurator Anne Kjellberg meiner antrekka Spook har designa er viktige for ettertida.
- Det er ein veldig viktig del av kulturhistoria vår, seier Kjellberg.
Vaks opp med mote
- Eg byrja tidleg, eg vart interessert i klede og mote allereie då eg var fem-seks år. Mor mi hadde atelier, så eg vaks opp med mote.
Etter å ha teke diplomeksamen ved motelinja på Statens Håndverks- og Kunstindustriskole i Oslo reiste 20 år gamle Spook til Paris for å gå eitt år på skule der. Men han gjorde det så bra at han vart verande i 40 år. Han var den første nordmannen som opna eige motehus i Paris.
- Eg er veldig fransk. Men eg føler meg absolutt norsk også, seier Spook.
- Treng ein plan
Spook seier han følgjer med på norske klesdesignarar. Spook er usikker på om det er mogleg å for unge designarspirar å gjere karriere på same måte som han.
- No er det andre retningar. Ein må i alle fall gjennom ein prosess, for å få dette til å fungere. Det er mykje som skal til, det er ikkje berre å teikne klede, ein må tenkje på kven ein teiknar for, og ein må ha ein stad å selje kleda. Det er eit heilt system, og det må ein planleggje, seier Spook.
Han trur norske designarar i dag må tenkje meir kommersielt for å hevde seg internasjonalt.
Spook-genseren
Den norske motekongen i Paris har designa kjolar for Sophia Loren, Dronning Sonja og Jane Fonda, men i Noreg er han kanskje mest kjend for Per Spook genseren, som han designa for Husfliden. Strikkemønsteret til genseren er framleis å få kjøpt, men dagleg leiar Hege Andresen på Husfliden i Oslo fortel at salet går litt opp og ned.
Men Per Spook vil helst verte hugsa for andre ting enn Husflid-genseren.
- Eg vert nok hugsa for å vere motedesigner eller motekonge i Paris, eg trur det er det som sit. Det er spesielt at nokon har hatt eit eige motehus i Paris, det er det eg er kjend for overalt.