61 år gamle Jean-Marc Cochereau skulle i helga ha dirigert Orleans Symfoniorkester i tre konsertar med musikk av Beethoven. Cochereau har vore orkesterets sjefdirigent sidan 1987.
Tre kvarters opplivingsforsøk
Mandag kveld øvde orkesteret på Bethovens tredje symfoni, «Eroica-symfonien». Midt i andresatsen Marcia funebre (Sørgemarsj) fekk den rutinerte dirigenten hjarteinfarkt. Ifølge den franske avisa Le Figaro vart ambulansen umiddelbart tilkalla, men tre kvarter med opplivingsforsøk kunne ikkje redde dirigenten.
Også faren døydde av hjarteinfarkt
Cochereau er langt frå den første dirigenten som har døydd medan han dirigerte. Giuseppe Sinopoli fekk også hjarteinfarkt under ei framsyning av Verdi-operaen Aida i Berlin i 2001. Greske Dimitri Mitropoulos døydde under ei orkesterprøve med Gustav Mahlers tredje symfoni i 1960.
Jean-Marc Cochereau gjekk dessutan i fotspora til faren Pierre Cochereau, som var hovudorganist i Notre Dame-katedralen i Paris, og som døydde av hjarteinfarkt i 1984.
Jansons overlevde hjarteinfarkt
Den mest dramatiske liknande situasjonen i Noreg i nyare tid, var nok då Mariss Jansons fall om på scenen under ei konsertframføring av Puccini-operaen La Boheme i Oslo Konserthus i 1996. Jansons overlevde hjarteinfarktet.
Mariss Jansons far, Arvid Jansons, var ikkje like heldig – han døydde på scenen i Manchester i 1984, under ein konsert med Hallé-orkesteret.
– Ein slik død han ønska seg
Den britiske musikkommentatoren Norman Lebrecht skriv på sin blogg i samband med dødsfallet at dirigenten Herbert von Karajan var så nervøs for å døy på scenen at han spesialbestilte forsking på temaet.
Ifølge direktøren for Orléans symfoniorkester, Catherine Mounier, ville Cochereau imidlertid ha sett på det å falle på sin post som ein verdig måte å døy på:
– Eg tenkjer, for å vere heilt ærleg, at det var ein slik død han ønska seg, seier Mounier til AFP.