Skodespelaren Tyrese Gibson kastar seg inn i debatten om mangelen på svarte nominerte til Oscar-utdelinga 28. februar. I eit intervju med People seier han at Chris Rock burde trekke seg som vert.
– Eg meiner at når alt kjem til alt, er det måten å bidra til endring på. Om du føler deg oversett av alle, hjelper det ikkje å sitte med hendene i fanget og klage. Du gjer noko med det.
Boikott
Og han får støtte frå rapparen 50 Cent. På Instagram ber han komikaren om ikkje å gjennomføre Oscar-jobben.
Oscar-juryen har fått mykje kritikk etter at Oscar-nominasjonane blei offentleggjort i førre veke. Både skodespelar Jada Pinkett Smith og filmregissør og vinnar av æres-oscar, Spike Lee, seier dei vil halde seg heime i år. Men Lee vil ikkje oppmode Rock, som er ein ven av han, til å boikotte:
– Han gjer det som han vil. Eg støttar han uansett, sa Lee i eit intervju med amerikansk frokost-tv i går.
Også George Clooney meiner Oscar-nominasjonane går i feil retning.
– Om du tenker ti år tilbake i tid, gjorde dei som nominerte ein betre jobb. Tenk på kor mange afroamerikanske skodespelarar som var nominert den gongen, skriv han i eit innlegg i Variety.
Nektar for rasisme
Men dei som stemmer fram Oscar-vinnarane, likar dårleg å bli kalla rasistar. Skodespelar Penelope Ann Miller seier til The Hollywood Reporter at det er fornærmande å bli kalla rasist.
– Eg stemte på fleire svarte skodespelarar i år, og er lei meg for at ingen av dei blei nominert. Men å påstå at dette skjedde fordi vi er rasistar, er fornærmande. I år var det ein har konkurranse om nominasjonane.
Mange har også etterlyst filmar som «Creed» og «Straight Outta Compton», som har svarte skodespelarar i sentrale roller, på nominasjonslistene.
– «Straight Outta Compton» var ein god film, men eg trur dei mista ein del av dei eldre jurymedlemmane, seier Miller.
No er mange spente på om Chris Rock kjem til å kommentere alt bråket under utdelinga 28. februar. Ricky Gervais, som sjølv har leia Golden Globe-utdelinga fleire gongar, oppmodar Rock til å utnytte situasjonen:
Chris Rock har ikkje kommentert bråket offentleg enno. Men då han var Oscar-vert for 11 år sidan, gjorde han eit poeng i opningsmonologen av at det var fleire svarte nominerte det året.