Dei fire deltakarane måtte i kveld kjempe mot kvarandre i sjangrane soul og country.
Den kampen var det Rein Alexander som tapte. Saman med RIta Eriksen fekk han færrast stemmer og Rein måtte forlate «Stjernekamp».
– Eg er så fornøgd med å kunne gå ut med det eg gjorde i kveld, fortel han til NRK.no, og seier han var mest nøgd med country-bidraget.
263 ord på 2 minutt
Country-bidraget hans, «Ain´t goin´ down (till the sun comes up)» av Garth Brooks bydde på litt meir av ei tekstutfordring, der han pøste ut 263 ord på 2 minutt.
– Denne country-låta var mi største utfordring. Eg hadde aldri trudd at hjerna mi kunne jobbe så raskt, seier han.
Han har hatt 15 øvingar dei siste dagane, men det var først på direktesendt TV at han klarte det.
– Det var ein siger. Eg har vunne så mange sigrar. Tenk kor langt eg har komt, kor mange hundretusenar som har stemt meg fram.
Rein var også ein av to som fekk færrast stemmer førre laurdag. Då var det Jenny Jensen som måtte ut.
- LES OGSÅ:
Venta i 20 år
Rein starta med å framføre den rolege og såre «A song for you» av Donny Hathaway, ei låt han har venta i 20 år på å synge.
– Det har vore ein av mine største favorittsongar i 20 år, ei låt eg aldri har turt å gjere fordi den er så perfekt.
Framføringa fekk Mona B. Riise til å måtte leite fram tørkleet.
– Eg må hulke litt. Det fins mange versjonar av denne låta, og det er sjeldan eg får høyre den så nedstrippa. Takk.
Men det var diverre ikkje nok.
«Arrreetha»
Rita Eriksen hamna også i faresonen i kveld, men får vere med vidare. Ho valde låta «Feel like a natural woman» av Aretha Franklin som sitt soul-bidrag.
Ole Evenrsrud lot seg imponere stort.
– Arrreetha, Rita, dette er fantastisk. Ord blir fattige, konstanterte han.
Etter eit klesskift og eit sjangerskifte frå soul til country, gjekk Rita på scena med «Some day you gotta dance» av Dixie Chicks.
Det var tydeleg at ekspertpanelet meiner det er i country-sjangeren ho høyrer heime.
– Velkomen heim til det du eigentleg driv med. Dersom nokon toppar dette, blir eg imponert, er dommen frå ekspert Ole Evensrud.
- LES OGSÅ:
Gjesteekspert på Country-feltet var Tor Milde, og han sette sitt godkjent-stempel på Rita.
– Dette var veldig, veldig bra. Dixie chicks er gladcountry, og dette var ei kjempefin framføring av en veldig bra låt, var den lystige dommen frå Slemme-Tor.
Tor «soulman» Endresen
Tor Endresen har fleire gongar sikra seg favorittstempel, og i kveld var ikkje noko unnatak.
Både Marianne Antonsen og Ole Evenrud peika ut Endresen som favoritt etter framføringa av «It´s a man´s man´s man´s world».
Men favorittstempelet har han hatt i Marianne sitt hjarte lenge før Stjernekamp starta.
Då ho var på konsert med Tor Endresen som 19-åring, blei ho litt forelska i han, og kveldens soul-opptreden brakte atter ein gong fram stjerner i augene på gjesteeksperten.
– Eg har berre lyst til å le, Tor! Dette er soul av ypparste klasse, gliste ho.
– Eg valgte ei utruleg sterk låt. Uansett kva vi bygger og lagar så betyr det ikkje noko utan ei kvinne, seier Tor sjølv om James Brown-låta.
– Mitt mål er å synge den slik at den mest ihuga kvinnesaksforkjempar kan seie seg einig, seier han etter eit fyrverkeri av ei framføring.
Sjølv måtte Tor ha ei hjelpande hand til å dra av seg cowboy-skoa etter framføringa av hans andre låt for kvelden, nemleg country-låta «Lonesome road blues» av Bill Monroe.
– Det gjorde avsindig vondt, ler han.
Neste gong er det viser og danseband som står på plakaten, sjangrar Tor er litt meir komfortabel med.
– Eg har ikkje vore i «nedrykksstriden» enno, men det har ikkje Tuva heller, seier Tor.
–Slått i bakken
Tuva fekk blanda tilbakemeldingar til soul-valet «I heard it through the grapevine»
av Marvin Gaye, men henta seg glatt inn igjen då ho gjekk på scena med country-låta «The way it goes» av Gillian Welch.
– Ikkje så super i dag. Du er ikkje den beste vokalisten her i kveld, men du er den råaste, var Ole Evensrud sin kommentar etter Tuva sin versjon av Marvin Gaye. Men beskjeden var klar etter country-framføringa:
– Der var du tilbake igjen.
Tor Milde, ein superfan av låtskrivar Gillian Welch, hadde heller ingenting å utsetje på Tuva sitt country-bidrag.
– Dette var heilt ubeskriveleg, fantastisk flott. Det er ei utruleg bra låt, og ein av mine favoritter fra i fjor, då plata kom, fortel Tor Milde, som la til.
– Eg blei heilt slått i bakken, sa Tor.
På gråten
Tuva var nesten på gråten etterpå, og turte ikkje møte augene til Tor Milde.
–Eg blei veldig letta då han sa det han sa. For meg er det heilt avgjerande å synge med sjela.
Ho har gjort det til ditt varemerke å velje artistar som ikkje er så kjent for folk flest.
– Eg vil gjere dei låtane eg likar best, og vil at fleire skal oppdage nye artistar, fortel ho, og legg til:
– Eg gjer det ikkje for å vinne, men for å gjere låtane bra.