Desse bileta er teikna med kulepenn

Du hugsar kanskje permane på skriveboka di på skulen, eller notisblokka ved telefonen, som var full av krusedullar teikna med kulepenn.

Samuel Silva frå Portugal har teke skriblinga eit steg vidare, han teiknar svært realistiske bilete med farga kulepennar.

– Eg har teikna med pennar sidan eg var tolv år, og med farga pennar i eit og eit halvt år. Eg blir stadig betre og eg trur eg berre har oppnådd 15 prosent av den kvaliteten som er mogleg å oppnå med kulepenn som medium, om ikkje enda mindre, seier Silva.

• LES OGSÅ: Flyttar grensene for kva eit fotografi kan vere

– Undervurdert

Silva har åtte Bic kulepennar i tillegg til svart. Han kjøper dei i vanlege bokhandlar eller på nett. Dei er heilt vanlege kulepennar, og teikningane er laga utan unntak med kulepenn, fortel han.

– Det som drog meg til kulepennar var utfordringa ved å prøve å skape noko bra med noko som blir brukt i kvardagen, og er undervurdert til bruk i kunst, seier Silva.

For å «blande» fargane lagar han strekar på kryss og tvers for å oppnå illusjonen om ein farge.

– Det handlar ikkje om kva du brukar, men om korleis du brukar det, seier Silva.

– Mektig medium

Silva finn inspirasjon i det vakre ved dyr, folk og natur.

– Det er eit veldig mektig medium, sjølv om det er utruleg vanskeleg å bruke. Kulepenn kan konkurrere med olje- og akrylmåling og kva som helst anna medium, seier Silva.

Sjølv om han har lyst til å bli ein betre og betre kunstnar, så har han nok ikkje tenkt å gi opp jobben sin heilt enno.

– Eg er berre ein advokat, kunst er ein hobby for meg, sjølv om det tek 5 til 50 timar å teikne kvar teikning, seier han.

• LES OGSÅ: Dette er ikke fotografier, men malerier

– Har blitt brukt lenge

– Eg vil ikkje seie at å teikne realistiske bilete med kulepenn er lettare enn vanskelegare enn noko anna, seier kunstnar Anders Eiebakke som sjølv har laga kunst med kulepenn som medium.

Han seier kunst med kulepenn ikkje er noko nytt.

– Kulepennen vart brukt for å sitere ein vestleg kultur, der alt skal gå fort, og også til kritikk av eldre klassisk kunst, men slik er det ikkje i dag. Sjølve kunnskapen om teikning er kanskje meir interessant i vår digitale tidsalder, seier han.

– Kulepennen har blitt brukt i kunst lenge, me har til dømes kunstnarar som Chuck Close, så eg er ikkje einig i at kulepennen er undervurdert, avsluttar han.

• LES OGSÅ: Dette er ikke fotografier – det er tegninger!
• LES OGSÅ: – Vi er blitt fotokonsumenter