Endrar teaterprogram etter 22. juli

På bakgrunn av hendingane i Oslo og på Utøya gjer Det Norske Teatret endringar i repertoaret for hausten. «Shockheaded Peter» blir flytta og kjem opp igjen på speleplanen ved eit seinare høve.

– «Shockheaded Peter» er av ein slik karakter at den vil verke upassande så kort tid etter terrorhendingane, seier informasjonssjef i Det Norske Teatret, Ida Michaelsen, til NRK.no.

«Det som skulle vere frydefullt og komisk ved framsyninga blir for sterkt så tett opp til tragedien, men med litt avstand i tid, vil den igjen kunne glede eit stort publikum med sin burleske og skakke form», skriv dei i ei pressemelding.

– Upassande så kort tid etter

Stykket er bygd på ei bok av den tyske psykiateren Heinrich Hoffmann i 1845 og skildrar kor gale det kan gå når ufyselege barn ikkje høyrer på dei vaksne.

«Dei som sug på tommeltotten får han kutta av, slemme gutar blir overmanna av dei som er verre, barn som leiker med fyrstikkar blir til ild og aske og dei som går med nasen i sky unngår berre så vidt drukningsdøden», står det om stykket på heimesidene til Det Norske Teatret.

Teatret meiner stykket «Abrahams barn» har ein karakter som er passande i denne tida og flyttar det frå Scene 3 til Hovudscena.

«Abrahams barn» tar for seg kristendommen, jødedommen og islam, er regissert av Kjetil Bang-Hansen og av og med Svein Tindberg.

Det stiller spørsmål ved at alle dei tre religionane gjer krav på Abraham som stamfaren sin. Er det eigentleg den same historia fortalt på tre ulike måtar? Stykket har premiere 9. september.

Les: Alt om terroren 22. juli

(Artikkelen held fram under biletet)

Ingen andre endringar

– Teatersjef Erik Ulfsby, som skulle vere regissør for «Shockheaded Peter», foretar ei skanning og ser om det er andre stykker som kan passe for ensemblet, som no står utan arbeid. Det eventuelle stykket vil då i så fall bli vurdert sett opp på Scene 3, seier Michaelsen.

Det er teatersjefen som tar dei endelege avgjerdene når det gjeld endring av repertoaret.

Det er berre dette stykket som blir kutta frå haustprogrammet. Mellom anna blir «Unge Werthers lidingar» av Goethe ståande på programmet.

– Vi trur og meiner at det ikkje vil vere så direkte forbunde med det som har skjedd. Det er ein gammal klassikar som vi har sett opp før og av ein slik karakter at det ikkje vil verke upassande, seier Michaelsen.