I kveld får designduoen prisen Nåløyet under eit arrangement i Oslo.
Det er bladet Henne som deler ut den årlege prisen. Juryen er sett saman av designarar, innkjøparar, fotografar, stylistar og andre motefolk.
I grunngjevinga for tildelinga skriv juryen mellom anna at dei «er imponert over det høge nivået på Haaning & Htoons kolleksjon, sidan dette er duoens første.»
Dei har tru på at Haaning & Htoon kan nå ut både på den norske, skandinaviske og internasjonale marknaden.
Har masse erfaring
Namnet på merket er sett saman av etternamna til Marianne Haaning Groos, norsk, med bakgrunn frå moteskulen Esmod, og Min Htoon, britisk seniordesignar utdanna ved Central Saint Martins i London.
Dei er i dag både kjærestar og designpartnarar.
Det er nøyaktig eitt år sidan oppstarten av merket, men allereie no får dei den gjeve designprisen.
– Frå første stund hadde vi full produksjon, det var ikkje noko heimelaga ved det, og vi fekk kjapt ein kolleksjon på beina. Og så har vi masse erfaring, seier Htoon til NRK.
Han har erfaring frå Donna Karan, Armani og Dolce & Gabbana, mellom anna.
Blant var Vatle, Camilla Bruerberg, Undorn, Sca Ulven, Flinga, Helje Hamre og kanskje det mest kjente namnet, Veronica B. Vallenes, som viste kolleksjonen sin under moteveka i København.
Vant for debutkolleksjonen
– Vi kallar stilen vår The New Classic. Vi brukar mest silke og klassiske stoff, og siktar mot ein skandinavisk look med britisk touch, toppa av ein underliggande edge, forklarar Haaning i februar/mars-utgåva av Henne.
Dei rettar seg inn mot det dei kallar ein mellommarknad, med prisar som varierer mellom 2000 og 4000 kroner.
Neste veke lanserer dei sin første økokolleksjon, når dei opnar Oslo Fashion Week. Dei vil tilby klede av økologisk stoff til lavare prisar, og brukar organisk bomull, spesielle fargeblandingar og resirkulert ull for å oppnå dette.
– Vi prøvar å jobbe så miljøvenleg som mogleg, og likevel kunne tilby klede til ein relativt lav pris. Økomoten ligg litt bakpå, men vi vil gjerne vere med på å endre det, seier Htoon til NRK.
I august blir kolleksjonen å finne i butikkane.
Nåløyet har blitt delt ut sidan 2004. Her frå utdelinga i fjor, då jeansmerket Mardou & Dean vant prisen.
Foto: Lien, Kyrre / ScanpixNy pris for tilbehør
For første gong vert det også delt ut ein pris for beste tilbehør, og den går til smykkedesignar Bjørg Nordli-Mathisen.
Juryen seier at «ho har skapt eit smykkemerke med eit klart og tydeleg konsept. Smykka er ein estetisk nytelse, og dei har ein sterk eigenart.»
I kveld vert også Folkets pris delt ut, der designaren med flest stemmer vinn. I fjor vant Fam Irvoll denne prisen.
Les meir om mote på NRK.no:
