Han skal finne «den nye Lomheim»

Kulturminister Anniken Huitfeldt har i dag utnemnt nytt styre for Språkrådet . Ny styreleiar er Ottar Grepstad, forfattar og direktør for Nynorsk kultursentrum.

Med dét er fyrste brikke i puslespelet om å finne ny språkdirektør lagt.

Gjekk i protest

– Eg er glad for at vi har fått på plass eit godt og kompetent styre for Språkrådet. Vi kjem no raskt til å lyse ut stillinga som direktør, seier kulturministeren i ei kort pressemelding torsdag ettermiddag.

Tidlegare i haust trekte halve styret i Språkrådet seg i protest mot kulturminister Anniken Huitfeldt si avgjerdsle om ikkje å tilsetje retorikkprofessor Kjell Lars Berge som ny direktør etter Sylfest Lomheim.

Eit einstemmig styre gjekk inn for Berge som ny direktør, men kulturministeren sa nei.

– Eg veit ikkje når

Ifølgje Dagbladet var årsaka til Huitfeldt sitt nei at Berge kom med knallhard kritikk mot ministeren då ho ikkje ville redde den nettbaserte utgåva av Store Norske Leksikon.

Ottar Grepstad var ein av tre styremedlemmer som då blei sitjande. Den ferske styreleiaren vil ikkje seie noko om kva tid han trur ny direktør vil vere på plass.

– Vår jobb blir no å finne ein direktørkandidat med så brei støtte at statsråden vil følgje rådet frå oss. Eg veit ikkje kor lang tid det vil ta, seier Grepstad til NRK.

Høyr Ottar Grepstad fortelje om si nye stilling. Reporter Stine Traaholt.