Renée Fleming held tirsdag kveld konsert i Oslo Konserthus i lag med Kringkastingsorkestret. På kveldens program står det ei rekkje operaarier – og tre poplåtar frå albumet «Dark Hope», som kom ut tidlegare i år.
Jobba med Strokes-produsent
Produsenten for «Dark Hope», David Kahne, har tidlegare produsert plater for band som The Bangles og The Strokes. Han jobba intenst for å tilpasse Flemings uttale til sjangeren.
– Han korrigerte meg heile tida, seier Fleming.
– Han sa eg ikkje måtte uttale orda så perfekt og korrekt, det måtte vere muntleg. Det var litt sjokkerande. På operascenen ville eg til dømes ha sunge «I want to», no måtte eg synge «I wanna».
– Fantastisk musikk
Fleming innrømmer at tenåringsdøtrene hennar i utgangspunktet kjende låtane betre enn henne.
Sjå henne fortelje om kva ho lærte under innspelinga:
Som å synge Mozart
Renée Fleming hadde forventa større fridom i uttrykket når ho song pop og rock enn elles, men det fekk ho ikkje av Kahne:
– Eg var overraska over disiplinen, seier sopranen.
– Kvar gong eg song litt friare, vrei produsenten seg i stolen og sa at det minte han om Las Vegas eller Broadway. Stilmessig var det som å skulle synge Mozart, ikkje fritt, rock- eller bluesaktig.
Du kan høyre låtar frå albumet og sjå videoen til Muse-coverlåten «Endlessly» på Renée Flemings heimeside.
Meir naturleg stemme
Fleming måtte legge ned stemma ein god del i forhold til sitt vanlege sopranrepertoar:
– Eg brukar ei heilt anna stemme når eg syng pop og rock, meir naturleg enn elles – stemmeleiet ligg omtrent der eg snakkar til dagleg, seier ho.
Ikkje crossover
Renée Fleming er tydeleg på at ho ikkje ville lage eit crossoveralbum og mikse sjangrar – ho ønska å ta steget heilt ut.
– Crossover har blitt ein eigen sjanger no, med songarar som syng popmusikk med operastemme, seier Fleming.
– Eg prøvde verkeleg å bli ein pop- eller rocksongar då eg gjorde dette. Eg skulle ønske eg kunne gjennomføre ei spørjeundersøkjing og finne ut kor stor del av publikum som har følgt meg. Eg har inntrykk av at mange likar det, mens nokre er puristar.
Konserten i Oslo Konserthus blir sendt i P2 26. november.
Her kan du sjå heile intervjuet med Renée Fleming: