Boazodoalli NIls Mathis Sara dadjá dan vástádussan njuovahagaide geat sihtet boazodolliid buorebut plánet vai ii gártta nu ahte oktanaga buktet gávpečorragiid njuovahagaide.
Norgga boazosápmelaččaid riikkasearvvi jođiheaddji, Ellinor Marita Jåma, lohká dehálažžan ovddidit dán ášši dan eanandoallodirektoráhta ođđa direktevrii gean ovddasvástádus leat boazodoalloáššit vai dakkár dilli ii čuožžil šat ja earenoamážit dál go orohagain leat njuovvangáibádusat. Go dát ii ábut šaddat noađđin boazodolliide, lohká Jåma.
Mannan vahkku ledje boazodoallit heađástuvvan go Norgga stuorámus boazonjuovahat ii váldán vuostá gávpebohccuid. Máŋggas balle šaddat bahádahkkin go danin eai ollašuhte njuovvangáibádusaid mat leat muhtin orohagain Finnmárkkus.
Finnmark Rein AS beaivválaš jođiheaddji Are Figved čilgii ahte njuovvan- váttisvuohta čuožžila go boazoeaiggádat háliidit ovtta ja seammá áigodagas njuovvat. Njuovahaga koordináhtor ges ávžžuha boazoeaiggádiid buorebut plánet, muhto dán vuoru leat geahččalan dustet hástalusa. Boazodoalus lea váttis plánet, čilge boazodoalli Nils Mathis Sara.
Boazodoallái Nils Mathis Sarai gal lea juo maŋŋit ja lohká juo manahan dietnasa go ii leat beassan vuovdit ovdal go ragat álgá.
- Guldal ášši:
