Boazodoallit heađástuvve mannan vahkkus go Norgga stuorámus boazonjuovahagas Finnmark Rein AS:s ii lean kapasitehta váldit vuostá gávpe- bohccuid.
Finnmark Rein AS beaivválaš jođiheaddji, Are Figved.
Foto: Ewa-Mari Hedman / NRKDál dáhkida njuovahaga beaivválaš jođiheaddji Are Figved ahte buohkat galget sáhtit buktit bohccuid sidjiide.
Njuovahaga beaivválaš jođiheaddji, Are Figved, lohpidii boazoeaiggádiidda golbma doaibmabiju mánnodahkii, vai njuovvan kapasitehta buorrána, vuosttažettiin áigo ráhppat Vuotnabađa njuovahaga.
Njuovahaga koordináhtor, Johan Mahtte Buljo, duođašta ahte Vuotnabađa njuovahat lea rahppon. Son muitala maid ahte guokte olbmo leat lasihuvvon Guovdageainno njuovahahkii.
Goalmmát doaibmabidju lei oažžut Kárášjoga Nortura njuovahaga vuoruhit bohccuid ovdalii sávzzaid, muhto nu eai vuorut njuovahagas, lohká Nortura regiovdnahoavda Davvin, Svein-Inge Jakobsen.
Finnmark Rein beaivválaš jođiheaddji čuoččuha ahte bohccot goitge vuoruhuvvojit bures Kárášjoga njuovahagas.
Are Figved čilge ahte njuovvan- váttisvuohta čuožžila go boazoeaiggádat háliidit ovtta ja seammá áigodagas njuovvat. Njuovahaga koordináhtor, Johan Mahtte Buljo, ávžžuha boazoeaiggádiid buorebut plánet.
- Guldal ášši:
