Troms Kraft áiggošii hukset 26 bieggamillu Riehpevárrái Ivguvuovdái. Omasvuona suohkan lea vuos šiehtadallamin huksejeddjiin ja galget gárvet cealkámuša čakčamánu álgui.
Bassevuovddi meahccestobu eaiggát Kari Nilsen Overelv dadjá dán šaddat stuorra vahágin sidjiide, go de eai soaitte šat dálveduristtát boahtit, jus šaddet geahččat bieggamilluid, eai ge guovssahasaid.
Suohkan mearređa
Omasvuona sátnejođiheaddji, Sigmund Steinnes ii jáhke suohkana addit huksenlobi, jus das ii boađe dienas suohkanii.
- Jáhkkimis lea váddásut oažžut suohkanstivrras čađa dakkár plánaid, mat eai boađe buorrin báikkálaččaide.
Omasvuona sátnejođiheaddji, Sigmund Steinnes oaidná váikkuhusaid dákkár huksemis, go 26 bieggamillu ceggejuvvojit guvlui, gos vánddardit sihke olbmot ja eallit. Norgga čáhcadat- ja elrávdnjedirektoráhta galgá doallat vuos álbmotčoahkkimiid gullán dihte maid Omasvuona álbmot oaivvilda bieggamillohuksemiin.
Makkár váikkuhusat?
Suohkan lea ráđđádallamin huksejeddjiin ja Steinnes ii loga sáhtit nu olus dadjat dás, go ii mihkkege leat mearriduvvon. Muhto jus ii boađe dienas dás suohkanii, de Steinnes ii doaivvo gal suohkanstivrra mieđihit huksemiid Riehpevárrái.
Omasvuonas leat máŋga turista fitnodaga, mat láigohit barttaid ja muhtumat sis fállet maid meahccemátkkiid. Bassevuovddi meahccestohpu šaddá lagamus ránnjá bieggamilloásahussii, ja eaiggát Kari Nilsen Overelv ballá, ahte šaddet heaittihit iežaset doaimma.
Sii vuosttildit nu garrasit, ahte Overelv lea gearggus iežas leŋget virjjiide ja sus leat olugat fárus jus šaddet čájehit vuostehágu.
