Ihttin álget sámi girkobeaivvit Muoffigis, Nordlánddas.
Čoahkkimis lea dálkkádatrievdamat ja eamiálbmogat guovddážis.
Magga, guhte logaldallá doppe, rámida girkoráđi vuoruheame.
– Dat lea hui ávkkálaš ja buorre danne go dán áigge lea oalle lossat bargat unnitloguide, eamiálbmotáššiiguin.
Ja girkus lea ovdalaš áiggis oalle stuorra vealgi, nu ahte dat doarjja maid girku lea dál bargan jo hui ollu jagiid, ja maiddái erenoamážit sámi girkoráđđi lea mu mielas hui buorre, dadjá Ole Henrik Magga.
Ollugat oasálastet sámi girkobeivviin
Máŋgačuođi olbmo davviriikkain ja ruošša beale sámis oasálastet sámi girkobeivviin Muoffigis mat álget ihttin ja bistet sotnabeaivái. Norgga girku njunnošat ja maiddai ođasmahttin, hálddahus ja girkodepartemeanttas leat ovddasteaddjit doppe.
Girkobevviid bajilčála lea bassi eanan, bassi sátni ja dainna dáhttu sámi girkoráđđi čalmmustahttit ahte kristtalaš olmmoš galgá daguid bokte ge čájehit ahte atná árvvus dan maid sivdnideaddji lea sivdnidan.
Nu lea ge luonddugáhtten , álgoálbmogiid luonddu vuoiŋŋalašvuohta ja biibbala sátni sivdnádusa birra guovddážis girkobeivviin.
– Eat sáhte dušše rohkadallat
Sámi girkoráđđi lea maŋimuš jagiid čielgasit bealuštan earret eará álgoálbmogiid Canadas geat vuostálastet Norgga oljofitnodaga Statoil bihkkásáddodoaimmaid.
Muhtumat sámis leat dán oktavuođas dovddahan ahte sámi girkoráđđi lea gozihišgoahtán menddo olu máilmmálaš áššiid, muhto Magga lohká dán bárggu leat aiddo fal biibbala vuoiŋŋa mielde.
– Mii eat sáhte dušše čohkkát ja rohkadallat ahte Ipmil dagašii duon ja dán. Olbmos lea alddis ovddasvástádus ja olmmoš lea ieš gaskaoapmi, ja dainna lea girkus seamma ovddasvástádus, dadjá Magga
Sámi girkoráđi jođiheaddji, Anne Dalheim, jáhkká sámi girkoráđi fertet ain olu jagiid ovddasguvlui Norgga almmolašvuođas cuiggodit eiseválddiid jos rihkkot álgoálbmogiid vuoigatvuođaid dahje áigot čađahit doaimmaid mat garrasit čuhcet lundui.