Sámediggeráđđelahttu Ellinor Marita Jåma lohka, ahte lullisámi oahpahusa dilli mánaidgárddiin ja skuvllain ovdána njozet. Odne álgá jahkásaš konfereansa Troandimis, man ulbmilin lea ovddidit lullisámegiel oahpahusa.
Muhto Jåma oaidná stuora hástalussan duohtan dahkat čáppa jurdagiid, nu guhka go ovttasge ii leat ovddasvástádus bidjat johtui ja koordineret doaimmaid mat buoredivčče dili.
- Dat manná njozet, stuorámus hástalussan lea gulahallan sierra institušuvnnaid ja ásahusaid gaskkas ja dáid doaimmaid jođiheapme, dasa fertešii gávdnat soapmása, gii dan dagašii, dadjá Jåma.
Sierra virgi doaimmahit bargguid
Sámediggeráđđelahttu ii leat duđavaš Lullisámegiela ovdáneapmái, son ohcala sierra virggi, mii livčče čatnon omd. Fylkkamánnii. Virggi hálddašeaddjis livčče beaivválaš ovddasvástádus koordineret dán barggu iešguđet institušuvnnain ja skuvllaiguin.
Dán vahkus lágiduvvo Lullisámegiel oahpahus konfereansa Troandimis čihččet háve. Váikke konfereansa lea juo máŋgii ovdal lágiduvvon, de eai vuhtto bohtosat doarvái bures, lohká Jåma.
Hástalussan lea go Lullisámegiel oahpponeavvut váilot. Jurdagat ja áigumušat leat buori miehtá Lullisámi, muhto ovttasbargu árgabeaivvis ovdána funet.
- Miehtá Lullisámi olbmot dahket mearihis buorre barggu, muhto dán koordineren váilu, muitala Jåma.
Nordlándda fylkkamánnis dat lea ovddasvástádus plánet Lullisámegiel oahpahusa. Seniorráđđeaddi Kevin Johansen mieđiha, ahte bargu sáhtašii ovdánit jođánabbot.
Son ii jáhke gal, ahte ođđa virgi dán varas livčče buoremus čoavddus ja lohká, ahte fylkkamánnis leat dál máŋga buori konkrehta čovdosa, mo áigot buoridit dili ee. gáiddusoahpahusain.
- Son lea gal ovttaoaivilis Jåmain, ahte dál ferte bidjat ain eanet návccaid dasa, mo dán barggu doaimmaha boahtteáiggis, lohká Johansen.
GULDAL ÁŠŠI: