Lea gonagas Haralda sárdni Sámedikkis mii lea duogážin dán áigumuššii. Sártnistis Sámedikkis 2009s dajai goanagas ahte gonagasriika Norga lea ásahuvvon guovtti álbmoga eatnamiidda.
– Ii dušše miessemánu 17. beaivi
– Danin lea lunddolaš ahte dán guovtti álbmoga našunálabeaivvit galget leat almmolaš bassebeaivin. Ii galgga dušše miessemánu 17. beaivi leat almmolaš friddjabeaivin, muhto maiddái sámi álbmotbeaivi, guovvamánu 6. beaivvi, dadjá Askild Gjerstad, gii ovddasta Miljøpartiet De Grønna Romssas stuoradiggeválggaide.
Gjerstad oaivvilda ahte liige friddjabeaivi dagašii buori lundui.
– Jus mii galgat ovddidit nanu servvodaga, de fertešeimmet addit olbmuide friddja dan sadjái go eanet bálkká. Mii hálidit ahte norgga bargiin galggašii eanet friddja vuoi geavahit unnit. Liige friddjabeaivi livččii buorre máŋgga dáfus, go ávvudit sámi álbmoga, dadjá Gjerstad.
Sii áigot maiddái ávžžuhit iežaset bellodatustibiid dan golmma eará riikkas gos sápmelaččat orrot, ahte sii galggaše seamma árvalit.