Nuorat geain lea sámegiella nubbingiellan Tromssas, ožžot dán mánu rájes sámegielat fáddariid vai besset eanet geavahit sámegiela maiddái astoáiggis. Fáttarin leat seamma ahkásaš nuorat, geain lea sámegiella eatnigiellan.
Dán ovttasbarggus leat mielde Gáissi giellaguovddáš, Romssa Universitehta ja joatkkaskuvlla nuorat. Sámegiel oahpaheaddji Inger Anne Gaup dat jođiha prošeavtta.
- Dát lea friija áiggedoaibma maid sii álggahit sámegielat ohppiin ja dain. Geat válljejit sámegiela nubbingiellan dahje amasgiellan. Sii ieža šiehtadit gos ja goas deaivvadit, muitala Gaup.
Geahččalit, go ii gávdno lunddolaš giellabiras
Go juo Romssas ii gávdno sámegiel biras, gos nuorat lunddolaččat beasašedje hállat eanet sámegiela , de lea geahččalit dákkár fáttarčovdosa lohká Gaup. Nuorat geat easkka livčče oahppamin sámegiela dárbbašit deaivvadanbáikki, gos besset geavahit sámegiela olggobealde skuvllalanjaid.
Sullii logenáre sámegielat joatkkaskuvlla oahppi, dat leat searvan fáttarin prošektii ja sii galget dás duohko astoáiggis deaivvadit daid nuoraiguin, geain lea ,sámegiella nubbin giellan. Dát nuorra fáddarat maid ožžot dađistaga bagadallama vai buoremus lági mielde nákcejit doarjut dáid seamma ahkásaččaid, geat easkka leat oahppamin sámegiela.
- Mii deaivvadat moatti gearddi mánus ságastallat mo nuorát ovdánit ja son ain oahpaha sin ja addá reidduid ja ideaid, main nuorat sáhttet bargat. Nuorat deaivvadit ee. ruovttuin ja dakkár báikkiin, gos gullo sámegiella, dadjá Gaup.
Giellalávgun mátkit
Buot nuorat geat leat mielde prošeavttas, vulget maid muhtumin giellalávgun mátkkiide vahkkoloahpain. Gáisi giellaguovddáš Tromssas, oažžu jahkásaččat sámedikkis ruđaid giella lávgumii ja oassi dáid ruđain dat leat, maid dál geavahit dán prošektii, lohká giellaguovddáža jođiheaddji Nicklas Labba.
Sii leat ilus, go leat ožžon ovttasbarggu daid sámegielat nuorain, go gávpotsámit dárbbašit duođaid eanet arenaid, gos sámegiella gullo, lohka Labba. Son maid rámida nuoraid , sihke daid geat leat oahppamin giela dal ja daid fáttar-nuoraid, go nu čielgasit ieža háliidit leat mielde seailluheamen ja nannemin sámegiela.
Sis lea vuosttas deaivvadeapmi boahtte vahkus.
GULDAL: