"Buorre fáddá!"
In mun lean lohkan girjji inge diehtán man birra filbma lei go čohkkedin kinostullui. Áidna maid mun dihten lei ahte dan namma lei "Almmái gii ráhkistii Yngve"
Dalle leage hui álki navdit ahte dat lea muhtin "homo-filbma". Ah, buorre fáddá, mun smiehtastin!
Nugo láve stuorra gávpogis, juohke sajis lea nu jalla olu rekláma/máinnus. Don livččet gal jáhkkán ahte kinos lea eará láhkai, muhto ovdalgo filbma álggii, de ledjen juo čohkkán guhká ja geahččan reklámaid/máidnosiid. Vuoi vuoi, 30 min..
Blurry-šjohká
Nu go námuhin, de in lean lohkan girjji ovdalgo gehččen filmma, ja dan láhkai mus eai leange nu olu vuordámušat, earret go ahte lea nuoraid filbma ráhkisvuođa birra.
Go de viimat álggii dat filbma, de mun suorganin veaháš. Dát han lea boaresáigásaš filbma?! Govat ledje veahá "blurry" nie movt boares filmmain dávjá leat.
Go mii oaidnit min váldorolla, Jarle Klepp, vuosttaš geardde de som muitala ahte dien áigges sis eai lean iPod, DVD ja eará ođđaáigásaš rusttegat, muhto ivdnás boblejáhkat, kreppa vuovttat ja synth-pop. Juo vuosttaš govas mii oaidnit ahte son lea lihkoheapme.
Jahki lea 1989 ja moadde nuora eai sin mielas oro heivemin servodahkii. Sii ledje deaivvadan musihka bokte, ja ii diekkár "heajos synth-pop".
Juste go Jarle viimmat lea šaddan lihkolažžan, de mii deaivvadat eará gánddain Yngviin. Mii fargga áddet ahte Jarle ráhkásmuvvá Yngvii.
Jarle rievdá, ja čuovodettiin su rievdama, de oaidnit maiddái mo su čuojahanjoavku rievdá.. Sii leat ožžon konsertafálaldaga.
Muhto Jarle hálida leat Yngviin ovttas, ja ii boađe hárjehallamiidda.
Konseartaeahket lea dán filmma ”jorggáldat”. Ollu geavvá ja geahččit čohkkájit stuolloravddas jorba čalmmiid.
Jođánis ja somás dialoga
Juoidá maid hálidan rámihit lea rollefigura Helge, Jarle buoremus ustit.
Helge orru leamen álggos hui tøffa ja politihkalaččat fitmat, muhto go mii oahpásmuvvat eambbo sutnje, de mii fuobmát ahte das maid son duođai berošta lea skihpáriin.
Filmmas replihkat šuvihedje ovddas maŋás ja ledje bures čállon. Ja mun ferten mieđihit ahte lei Helge gii jođihii ja hervii/krydderasttii dan buori dialoga.
Go lea sahka neavttáriid birra, de ferten dadjat ahte váldorolla neavttár lei čeahpit go ledjen jáhkkán. Rolf Kristian Larsen dat lei gii neavttaša Jarle Klepp. Su leat oaidnán ovdal "Fritt Vilt"-filmmas, mas mu oainnu mielde ii lean čeahppi, muhto eahpesihkar.
Debuttanta Artur Berning (Helge) barggai maid buori bárggu dán filmmas.