”Veien til lykke”
dahje, ”The pursuit of happyness” lea drámafilbma ovtta geafes bearašalbmá birra Chris Gardner (Will Smith) gii rahčá fitnemis láibbi beavdái mánus mánnui. Son lea gieris ja ráhkis iežas viđajahkkásaš bárdnái Christopherii (Jaden Smith) ja bargá nu bures go sáhttá beassat eret daid ekonomálaš váttisvuođain muhto ii menostuva. Eamidas Linda (Thandie Newton) ii nákce šat, ja guođđá sihke isidasa ja sutno viđajahkkásaš máná.
Vuovdi ja oktoáhčči Chris geahččala oppaáigge ohcat buoret barggu ja oažžu loahpas oasusgávppašanfitnodagas traineebarggu bálkká haga, ja doaivu son loahpas oažžu fástabarggu nu ahte boahtteáigi čuvggodišgoahtá veahá.
Muhto bálkká haga ii suitte Chris máksit visteláiggu ja bálkestuvvoba olggos ja gártaba bártniinas orrut gos beare gávdnaba idjaráfi, nugo almmolaš hivssegiin ja nu ain.
Buorre filbma?
Oppálaččat lea dát huuui hui buorre filbma, gos sihke beasat reaškit ja ganjaldit vurrotlágai. Will Smith lea hui čeahppi neaktit ja historjá lea bures ráhkaduvvon. Dá lea filbma maid gánnáha geahččat!
Nammaduvvui balkkašumiide
Will Smith nammaduvvui sihke Golden Globe ja Oscar balkkašupmái kategoriijas Buoremus almmáiolbmo oaiverolla dáinna rollain.
