Nuorat ohppet máttuideaset giela

Sii ohppat máttuideaset giela

Girkonjárgga joatkaskuvllas leat dál sullii 30 oahppi geat lohket sámegiela vuosttaš ja nuppigiela dásis. Amasgiela-dásis ii leat dál oktege oahppi. 1997 rájes leat dán skuvllas oahpahan sámegielas, nu muitala Girkonjárgga joatkaskuvlla oahpaheaddji Sverre Østerbøl.

Sámegiella ii galggašii jávkat

Ørjan Johnsen lohká iežas fertet dego váldit ovddasvástádusa ja fievrridit sámegiela viidáseabbot iežas bearrašis. Iežas muitala leat Deanus bajášaddan, muhto ollugat su bearrašis leat massán sámegiela. Danne áigu son váldit giela ruovttoluotta bearrašii, ja fievrridit dan viidáseabbot.

Sandra Lánsman Henriksen lohká maid sámegiela Girkenjárgga joatkaskuvllas. Son hálida oahppat sámegiela danne go su áhčči lea sápmelaš ja soaitá vel dannege hálidit danne go su máttut ledje sápmelaččat.

Rektor dáhtošii eanebuid oahppat sámegiela

Girkonjárgga joatkaskuvlla rektor Trond Hansen muitala skuvlii boahtit ohppiid Mátta-Várjjagis, Deanus, Unjárggas ja máiddái Kárášjogas.
Dán jagi ii loga ovttage leat lohkamin sámegiela amasgiellan, váikke Mátta-Várjjagis leat olu nuorat geat leat massán eatnigielaset. Ovddit jagiid gal leat máŋggas lohkan sámegiela amasgiellan justa danne go hálidit oahppat fas sámegiela, mii lea sin máttuid giella.