Otne meannuda Porsáŋggu gielddastivra ođđasit skuvlaheaittihanášši. Lei
juovlamánus mannan jagi, ahte gielddastivrra eanetlohku, mas lea olgeš- ja ovddádusbellodat, mearridedje heaittihit skuvllaid Billávuonas ja Bissojogas.
Fylkkamánni lea meannudan lobálašvuođa dán mearrádusas, ja Billávuona váhnenráđi jođiheaddji Helen Johannesenis leat stuorra vuordámušat otná gielddastivrračoahkkimis.
- Mii gal vuordit, ahte otná 1-10 skuvllafálaldat doalahuvvo sihke Billávuonas ja Bissojogas. Dego lea čájehuvvon, de ii leat lobálaš ná heaittihit skuvllaid almma váikkuhusguorahallamiid haga, dadjá Johannesen.
Vuordámušat badjin
Billávuona skuvlla váhnenráđi jođiheaddji vuordá ge, ahte gielda doalaha dán guokte skuvlla, danin go lea lobiheapmi heaittihit skuvllaid jus eai leat váikkuhusguorahallamiid dahkan ja sádden ášši gulaskuddamii.
Ášši lea jorran guhká gielddas ja leige juovlamánus mannan jagi ahte, gielddastivra mearridii heaittihit dáid skuvllaid seastimiid dihte.
Bissojoga ja Billávuona skuvllat leat dehálažžat kveanagiela ja sámegiela seailluheamis gielddas.
- Imaš jus eai rievdat mearráđusa
Helen Johannesen áigu ieš čuovvut gielddastivrračoahkkima ja son gal hirpmástuvvá, jus fal doalahit dan mearrádusa maid juovlámánus dahke.
- Dat lea imaš, jus nu dahket, go cuoŋománu 19 beaivve dieđihuvvui, ahte juovlamánu mearrádus ii lean lobálaš ja nu ii leat maiddái eanet lobálaš dahkat dan seamma mearráđusa miessemánus, muitala Johannesen.
GULDAL: