Bessetgo eamialbmogat váikkuhit?

Otne digáštallá Ovttastuvvan Nášuvnnaid Bissovaš Forum eamiálbmogiid stuorra máilmmekonferánssa birra, man ON lágida guovtti jagi geahčen. Dát lea stuorra ášši jus eamiálbmogat eai beasa leat mielde váikkuheamen dán konferánssas, nu mo leat sávvan.

- Go ON lágiđa konfereanssa, de dan jođihit stáhtat, dain lea váldi doppe ja dát sáhttá leat várálaš eamialbmogiidda, go konfereansahan lea min birra. Muhtin stáhtat sáhttet maid geavahit dán konfereanssa vejolašvuohtan ráddjet eamialbmogiid rivttiid, muitala Kenneth Deer.

Deer lea oassin globála koordinerenjoavkkus, mii lea gáibidan, ahte eamiálbmogat galget beassat leat mielde ráhkkaneamen máilmmekonferánssii, mii lea guovtti jagi geahčen.

Smávva lávkkit

Mexico stáhta, mii lea ON:a koordinahtor, lea dohkkehan dan. Dat juo iešalddis lea mearkkašahtti, go dat ii leat goassiige geavvan ovdal, ahte eamiálbmogiin lea sierra áirras mielde ráhkkananbarggus.

Sámi olmmošvuoigatvuođaid áššedovdi John Bernard Henriksen Váljjejuvvui oktašas eamialbmot koordináhtorin dán jagi álggus.

Lea vuosttaš geardde, ahte ON lágida máilmmekonferánssa eamiálbmogiid birra, muhto go čoahkkin galgá lágiduvvot ON:a váldočoahkkimis (generalforsamling) de ON njuolggádusat gildet eará go stáhtaid oasálastimis. Dán eai dohkket sii, dadjá Kenneth Deer.

- Ii oba sáhtege ordnet konfereanssa albmogiid iešstivrrejumi birra ja de guođđit sin ollásit olggobeallai, álgoalbmogiin ferte leat dássálaš riekti váldit dasa oasi, lohká Deer.

- Eamialbmogiidda ferte sadji

Konferánsa galgá hábmet deklerašuvnna politihkkálaš áigumušain eamiálbmogiid ektui, ja danin lea dehálaš, ahte álbmogat ieža leat mielde dan barggus. Muđui dat lea vahát ja boasttudáhkku, dadjá Kenneth Deer.

- Dát boahta leat hástalussan midjiide ja maiddái stáhtaide, čohkkáđit njunnálagaid álgoalbmogiin dássálagai seamma beavddi guoras, árvala Deer.

ON:a bissovaš forum gal doarju dán oalát ja jođiheaddji Edward John gal dadjá sin gielgasit cealkán sihke ON:ii ja stáhtaide, ahte eamialbmogiidda ferte várrejuvvot sadji.

- Sii lea addán čielga dieđu, ahte eamialbmogat berrejit leat mielde dán konfereanssas, ii sáhte dušše gieđahallat sin áššiid, almma sin haga, dadjá John.

GULDAL: