Vaikke vel son ikte dovddastii ge iežas leat gottihan dan 77 olbmo ja soardán vel golmma geardde eanet, de ii ane Anders Behring Breivik iežas bargan maidege baháid.
Mielas eanet tearrorii
Nu sáhttáge leat dalle váldokonklušuvdna maŋŋá Behring Breiviikka iežas čilgema Oslo diggegoddái otne.
Čilgedettiin son duođaštii ahte su ii cakkašii mihkkege ođđasit bávkaleamis ja goddimis olbmuid jus goas ge boađášii dakkár vejolašvuohta.
– Boasttu govva
Norgga mediat leat vikkahan su dagu leat soaittáhat-dahkun ja sivvan daguide galgá mahkká leat go son lea erenoamaš hearki ja vašuheaddji vuoittahalli, áibbas iešdovddu haga.
Nu son fallehii dan gova maid mediat leat ráhkadan áššis ja su persovnna birra. Dan seammá oktvavuođas čáhkadii vel rámidit iežas tearrordagu.
Su tearrordahkui gottahallanolbmuid lagamuččat gal dalle bárde oivviideaset.
Rámida iežas
Behring Breivik logai hállat iežas lágániidda, geat galget leat seamma oaivilis go ieš.
Tearrordagus son gohčoda eanemus ivdnámus ja girjámus dahkun mii leš leamaš Eurohpas maŋŋá nuppi máilmmesoađi.
– Bággehallá tearrorii
Go ráfálaš revolušuvdna heađuštuvvot oalát, de ii leat eará vejolašvuohta go veahkaválddálaččat dan dahkat.
Su mielas ii leat čiegus ášši ahte máŋggákultuvrra – ja sisafárrrejeaddjiid vuostálastiin ii leamaš vejolašvuohta oainnuid ovddidit maŋŋá nuppi máilmme soađi, mii su mielas baicce lea dat duohta tearror.
– AUF = Hitlerjugend
Son hálidivčče ahte bargiidbellodat rievdadivčče sisafárrenpolitihka ja dasto son buohtastahttá vel bargiidbelloga AUFa dološ nazi-áigge Hitlerjugend nammasáš nuoraid organisašuvnnain.
Jus 70 olbmo heakkahuhttin, dagahivčče rievdadusaid, de livčče dat su mielas hehttet riikka massimis etnalaš joavkku, kristtalašvuođa ja kultuvrra.
Behring Breivik gohčoda norgga álbmoga álgoálbmogin ja atná dohkketmeahttumin go earát leat beassan váldit badjelasaset norgga, koloniseret dan, nu go lohká. Dáppe han leat sii orron badjil 12 duhát jagi.
– Norgalaččat olgguštuvvon
Čilghusastis son maid jearai manne davviriikkaid - ja eurohpalaš álbmogat, maid son gohčoda álgoálbmogin, meannuduvvojit heajubun go eará álbmogat, ja manne gul dakkár álbmotovddasteaddjit steampalastojit rasistan ja nazistan, seammás go eará máilmmeosiid álbmotovddasteaddjit ožžot doarjaga ja leat dohkkehuvvon.
Eanaš politihkka
Behring Breivik beasai olles 75 minuvtta hállat eske ovdal gaskabeaivvi.
Dáinna sáhkavuoruin son livčče galgan eanaš iežas bealuštit, muhto sáhkan šattai dan sadjái hui ollu su politihkálaš oaidnu.
– Viggá mythaid ealihit
Sosialantropologa ja professor Hylland Eriksen oaivvilda čilgehusas leat ollu boasttuvuođat. Earret eará lea eahpikeahttá Norggas cealkinluđolašvuohta ja mediat eai sensurere sisafárrema vuostálastiid.
Behring Breivik geahččala myhtaid ealihit iežas čilgehusain, lohká Hylland Eriksen Aftenposten áviisii.
Behring Breivika čilgehus maŋŋodii iđđedis go duopmár gávnnahuvvui bealálažžan. Su fertejede lonuhit earáin duopmáriin go ovdagihtii lei almmolaččat cealkán ahte Behring Breivik ánssásivčče jápminduomu.