– Theo dáidda galgá ain eallit, vaikko lea lossat. Nu lohká su áhčči, sámi komponista John Persen. Son háliida doalahit áidna bártni dáidda heakkas, ja lea danin digitaliseren buot govaid ja sárgumiid maid Theo guđii. Dáiguin son háliida ráhkadit sierra neahttagalleriija.
Jámii nuorran
Theo jámii diibmá, 26-jahkásažžan. Dieđusge lea dát leamaš ja lea ain lossat. Muhto morraša sáhttá mángga ládje dustet ja dikšut. Ja áhččeolbmui lea leamaš ávkkálažžan bargat Theo govaiguin.
– Lean digitaliserenbargguin nagodan časkadit morraša, lohká áhčči.
Govat báhcán muitun
Sierra muitočájáhusas Oslos leat govat leamaš vuovdemassii. Muhto su lagamusat eai leat vuovdán govaid main Theo lea iežas sárgon.
– Dát portreahtat addet čiekŋalit muittu áidna bártnis, go dábálaš govvejuvvon porteahttagovva. Danin dat galget doalahuvvot bearrašis.
Oasáš muitučájáhusas Oslos.
Foto: Brita Åse Norlemann / NRKErenoamáš attáldagat
Theo sárgunoahpaheaddji, Jan-Cato Bøttger, oahpahii ja nevvodii Theo mánga jagi. Son oaivvilda ahte Theos ledje eamiattáldagat mat eai leat jur juohke dievá duohken.
– Son lei erenoamáš talenta, gii livččii sáhttán šaddat dovddus dáiddárin oba máilmmis. Theo searaid gal beassá vásihit dušše moddii eallenagis, oaivvilda son.
