Gatas Parlament álmmuha cd-skearru "Dette forandrer alt", masa leat iežaset vuohkkái heivehan kárášjogajoavkku rOlfFas lávlaga «Toppløs», muhto de eai leat krediteren joavkku ja čálli mii lea dábálaš.
– Mon in gal váldde dán nu lossadit, go dieđán ahte dat sáhttá dáhppáhuvvat, juoga maid iežamet buvttademiin jo oainnan, lohká rOlfFa njunoš Rolf Morten "rOlfFa" Amundsen.
Son lohká gal buorre jos nákcejit divvut dien ja fitnen rivttes dieđuid mielde.
Šallošit dáhppáhusa
Vuosttaš maid Gatas Parlament ovddasteaddji Elling Bergersrud lohká dása lea ahte šallosa go nie lea geavvan.
– Rievttimielde lea lávlaga namma «Toppløsjoiken med rOlfFa», muhto de eat leat gulahallan designerin dán birra ja ii lean šat áigi divvugoahttit, juoga mii ii lean berret dáhppáhuvvat, lohká Bergersrud, gii vel lasiha ahte ná sáhttá dáhppáhuvvat.
Bergersrud lohká gal heahpanan go dán fuomášedje.
– Veaháš gutni gal
Čálli ja njunuš kárášjogajoavkkus rOlfFas, Rolf Morten Anti Amundsen, ii loga áššin dáhkat nu ollu.
– Lea han veaháš gutni go joavku dego Gatas Parlament geavaha min lávlagiid skearruin, lohká Amundsen.
Gatas Parlament ii loga cd-skearrun gal sáhttit maidiige dáhkat, muhto daid digitalálaš ossiin galget divvut vuoi čálli fitne TONO-ruđa.
– Mii divvut gokko sáhttit, lohká Elling Bergersrud.
Gatas Parlament čuojaha otne bearjadaga Rockefelleris Oslis, Øya festivala oktavuođas, gosa leat fitnen sámi rappara SlinCraze mielde lávdái.