Ii leat goassege nu ahte lea dušše okta bivttasmálle mii lea trendy jáhkeáigodagas, ja dat addá dieđusge olu válljenvejolašvuođaid olbmuide. Muhto eanemus čalbmáičuohcci bárru dán geasi, lea dat ahte galget leat šerres ivnnit biktasiin, dahje liigehearvvain nugo boahkániin.
Jos šerres ivnniiguin ii soabat, de ges lea "safari-look" maid hui guovddážis geasset. De ges lea sáhka čuvges ivnniin ja áinnas galget biktasat olggosoaidnit dego livčče leopárda-, sebra-, dahje eará vildaealli náhkis ráhkaduvvon.
Dasto lea maid vielgat hui dehálaš dán geasi, ja dál ii leat šat nu ahte galgá válljet juogo vilges buvssa dahje báiddi. Dán geasi galgá baicca visot leat vielgat; báidi, buvssat ja vel skuovat ge. Ja áinnas guhkes fuolpu mii ollá láhttái.
Dasto namuha Ellen Anna maid náhkkereddjuid. Muhto dál eai galgga čáhppes ja sevdjesivnnát náhkit, baicca čuvges náhkkereddjot.