– Dáidda lea hui guovddažis sámi kultuvrras, ja danin dákkár deaivvadeapmi heive bures Sápmái, lohká Elle Sofe Henriksen gii lei mielde lágideame KOLT-deaivvadeami Guovdageainnus.
"Sullii ná"
KOLT mearkkaša Kind Of Like This, “Sullii ná”. KOLT galgá leat deaivvadanbáiki dáiddáriidda ja eará kreatiiva olbmuide, ja dás besset sii cađahit kreatiiva proseassaid ovttas eará dáiddáriiguin. Ja dát proseassa lea deháleabbo go ieš dat loahppačájáhus dahje -čájálmas.
– Dávjá dáiddarat barget okto hui ollu. De lea dehálaš sidjiide beassat earáiguin deaivvadit, ovttasbargat ja obalahkái oahpásmuvvat, lohká son.
Vásihit kreatiiva dollagárgasa
Koreográfa Alexandra Wingate álggahii KOLTa jagis 2007 go váillahii deaivvadanvejolašvuođa kreatiiva oahppásiiguin miehtá Eurohpá. Son háliidii ahte son gii ii oro stuora gávppogis, maiddái galgá beassat vásihit kreatiiva dollagárgasa ovttas earáiguin,
Álggu rájes leat lágiduvvon čieža KOLT-deaivvadeami, eanas dáin Ruotas. Diibmá lágiduvvui KOLT maiddái Riddu Riđđu-festiválas.
– Dat lea šaddan mihá stuorábun go ledjen jáhkkán álggos, ja lea erenoamáš miellagiddevaš go davvi-guovllus ja sámis lea oasálastigoahtán, lohká Wingate.
Eará dáiddasurggiin rávvagat
Guovdageainnu deaivvadeapmái serve sihke dánsejeaddjit, koreográfa, govvadáiddárat, čállit ja maiddái duojár. Elle Sofe Henriksen lea ieš dánsejeaddji, ja oasálastii Riddu Riđđu-KOLTas.
– Go okto bargá, de dávjá olmmoš vállje daid seammahat čovdosiid. De lea buorre oaidnit maid earát dahkat, fuomášit ođđa vejolašvuođaid. Mu mielas lea hui soma go áibbas eará dáiddasurggiin bohtet oaivilat, go dávjá leat dušše dánsejeaddjit ja koreográfat mat dadjet juoidá. Olmmoš oahppá go earáid guldala.
KOLT maiddái boahtteáiggis
Son gal áinnas lágidivččii dákkár deaivvademiid Guovdageainnus maiddái boahtteáiggis. Son háliidii ahte olbmot galge boahtit Sápmái oaidnit guovllu čábbodaga.
– Máŋgasat dáin háliidit boahtteáiggis boahtit ruovttoluotta bargat prošeavttuiguin dáppe, ja jurdda livččii ge lágidit KOLT dáppe maiddái boahtte jagi.