Finnmárkkuopmodat, FeFo, mii lea okta dain ásahusain main Ávjovári eamiálbmotguovlu lea ohcan ruđa, gal lea hilgon ruhtaohcamuša.
– Mii oaivvildit ahte lea stáda ovddasvástádus ruhtadit dákkár prošeavtta, lohká FeFo direktevra Jon Meløy.
Ávjovárri eamiálbmotguvlui gullet Guovdageaidnu, Kárášjohka ja Porsáŋgu. Guovdageainnu sátnejođiheaddji Klemet Erland Hætta čilge ná manne Ávjovárri lea oaidnán dárbbu bidjat johtui prošeavtta mii guorahalašii makkár hehttehusat stáhtas leat, go lea sáhka luonddu gáhttemis.
– Ovdabargu mii stáhta bealis lei galgat dahkkot ii leat čađahuvvon ja de oaidnit mii dárbbu juridihkalaš ja erenoamáš iskkadeapmái, lohká Hætta.
– Ii dušše stáda ovddasvástádus
Vuosttaš amanueansa dr. Juris. Øyvind Ravna, ii leat gal oalát ja obbalaččat ovttaoaivvilis FeFo-direktevrrain dainna ahte lea dušše stáda ovddasvástádus ruhtadit dákkár prošeavttaid.
– Sáhttá leat gal juste dán oktavuođas stáda ovddasvástádus guorahallat rivttiid, muhto FeFo ii sáhte obbalaččat hoigat eret ovddasvástádusa guorahallat eamiálbmoga rivttiid. Finnmárkkukommišuvnna barggu ektui, lea dát maiddái FeFo ovddasvástádus, lohká Ravna.
FeFo-direktevra Meløy lea gal ovttaoaivvilis Ravnnain juste Finnmárkkokommišuvnna ektui, lea baicce obbalaš ruhtadeami ektui ahte eaba leat čuođi proaseantta ovttamielalaččat.
Vaikko jurista Ravna mieđiha ahte ii dovdda buot daid formálalaš eavttuid maid ektui ásahusat juolludit ruđa, de čuovvu Ravna mielas gal liikkáge muhttin muddui ekonomalaš ovddasvástádus, go lea sáhka guorahallat rivttid Finnmárkku eatnamiidda.
Strategalaš jurdda
Guovdageainnu sátnejođiheaddi Klemet Erland Hætta čohkká ovttaláhkái goabbatbeal beavddi dán áššis, go Ávjovári bealis lea son mielde leamaš meannudit ruhtadanohcamuša FeFoi, muhto nuppe beal beavddi fas FeFo stivraáirrasin, son lohká iežas ovttaoaivilis ahte lea gal rievtti mielde stáda bargu guorahallat eamiálbmogiid rievttiid.
NRK Sápmi ferte dasto jearrat, manne son dalle lea Ávjovári bealis sádden FeFoi ruhtaohcamuša dán prošektii.
– Mii leat iskan daid vejolašvuođat mat leat. Mii leat sádden sihke Finnmárkoopmodahkii, Sámediggái ja Finnmárkku fylkkagildii. Dat lea dan dihte go Birasgáhttendepartemeanta lea álggos hilgon ohcamuša. Go leat earáide maid sádden ohcamuša, de oažžut maid eanet fuomášumi. Dakko bokte sáhttit maid oažžut veahki bargat ráđđehusa ektui vai sii loahpaloahpas ruhtadit dan. Soaitá mis leamaš maid strategalaš jurdda dáinna, lohká Hætta.